ICC-p nalunaarusiaa nutaaq ullumi saqqummiunneqassaaq
Nalunaarusiaq aningaasaateqarfik OAK suleqatigalugu suliarineqarpoq, tassani Nunatsinni siunissami aatsitassarsiornissamut atatillugu aningaasarsiornikkut allannguinissat erseqqissarniarneqarlutik.
Manna tikillugu inuiaqatigiittut aaqqissuussinerit assigiinngitsut, aatsitassarsiornikkut ineriartortitsinerulernerup kinguneranik qimakkiartorneqalissapput ilaatigut avataaneersunik nutsertoqalernissaa pissutigalugu aamma suliffeqarfiit annerit nunanit allaneersut Nunatsinneeqataalernerisigut, Inuit Issittormiut Siunnersuisoqatigiiffiat tusagassiuutinut nalunaaruteqarluni taama allappoq.
- Kalaallit ataatsimoorlutik pisinnaatitaaffiisa qulakkeerneqarnissaat, nunat tamalaat akornanni periarfissat atuuttut atorlugit taakkualu ataatsimoorussamik pisinnaatitaaffiit qulakkeerniarneqarnerannut qanoq atorluarneqarsinnaanerat nalilersussallugu, allanngulernerit nalaanni pingaaruteqarluinnarpoq, nalunaarusiap saqqummiunneqarnissaanut atatillugu tusagassiuutinut nalunaarummi taama allassimavoq. Nalunaarusiaq ullup qeqqata siorna aqqanermut tusagassiortunik katersortitsinermi saqqummiunneqassaaq.