ICC-p naggueqatigut Ruslandimiittut tikeraalerpai
ICC-mmi siuttuisa Ruslandimi naggueqatitsinnut Inunnut tikeraartarnerat qaqutigoortuuvoq.
ICC-mi siulittaasoq, Aqqaluk Lynge, sapaatip-akunnerata tulliani tikeraarnermi siuttuussaaq, Tjukotkap ICC-mi pisortatigoortumik ilaasortanngorneranit ukiut 20-nngornerat nalliuttorsiutigiartorneqartussaalluni, naggueqatitsinnillu Tjukotkamiittunik, 1100-innaasunik, suleqatigiinnermut isumaqatigiissutit nutarterniarlugit.
ICC-mi siulersuisut 2001-imi Tjukotkamut kingullermik tikeraarput, Aqqaluk Lyngep 1997-imiit 2002-mut siulittaasuunerani siullermi.
Tjukotkami namminersornerulluni oqartussat taamani guvernøreraat milliardææri, Roman Abramovitz, Amerikap kippasissuani taamani ilisarisimaneqanngivissoq, taannalu Aqqaluk Lyngep suleqatigiinnissamik maanna atuuttumik atsioqatigaa.
Roman Abramovitz tuluit arsaattartuinik Chelseakkunnik piginnittunngorami nunarsuaq tamakkerlugu kingorna tusaamasarsuanngorpoq.
Tjukotkami guvernøritut maanna taartigivaa Roman Valentinovitch Kopin, ICC-llu Tjukotkami immikkoortortaata ICC-p siulersuisui pulaartigisussaavaat, 2001-imilu isumaqatigiissutip nutarternissaanik siunertalimmik atsioqatigiissallutik.
Aqqaluk Lyngep saniatigut Nunatsinnit peqataassapput Carl Christian Olsen, Puju, Hjalmar Dahl aamma allattoqarfiup pisortaa, Rena Skifte, kiisalu ICC-p qitiusumik allaffiani pisortaq, Alfred Jakobsen.
