ICC-p EU kimigiiserfigissavaa

Kalaallit aallartitaasa piumasaat malinneqaraluarpat, puisinit tunisassiat EU-mut aggustip 20-ani eqqusseqqusiunnaarnissaq attanneqaannarpat, EU-p Issittumi Siunnersuisoqatigiinni alapernaatsutut inissisimalernissamik kissaataanik itigartinneqassagaluarpoq.

ICC-mi ataatsimeersuartut marlunngormat ataatsimiinnerat pikkunartumik naareersoq, nunat sisamat aallartitaat immikkut ataatsimiipput. Kalaallit aallartitaasa ataatsimiinerminni isumaqatigiissutigaat, EU-p Issittumik Siunnersuisoqatigiinni alaernaatsutut inissisimalernissamik kissaataanut ICC akerliussasoq. Kalaallit aallartitaat marluk KNR-imut taama oqarpoq.

ICC-p siulittaasuata James "Jimmy" Stotts-ip oqaluttussat avataatigut oqaaseqarami kissaat taanna saqqummiuppaa, Canada-miullu aallartitaannit marlunniit, Mary Simonimit Johnny Petersimillu ingerlaannaq taperserneqarluni.

Kisianni kalaallit aallartitaata ataatsip aarleqqutigaa, EU-p Issittumik Siunnersuisoqatigiinni alapernaatsutut inissisimalerusunnera, ICC-p akerlilersorpagu, EU inunnut issittormiunut ikinngutaajunnaarluni akeranngorsinnaasoq.

James "Jimmy" Stotts aallartitanut aamma kaammattuivoq, uranimik piaanermi aammalu gassimik uuliamillu qalluinermi ajornartorsiutaasinnasut oqallisigeqqullugit.

KNR-imiit paasisagut naapertorlugit, uranimik piiaanisamut ICC-p naaggaarnerata allanngortinnissaa, kalaallit tungaanniit kissaatigineqanngilaq.