ICC-p ataatsimeersuarnerata ingerlarnga Hans Enoksenip iluaraa

Allattoq Mads Lynge
juulip 14-at 2006 10:48

Naalakkersuisut siulittaasuat Hans Enoksen isumaqarpoq ICC-p ataatsimeersuarnera nunatsinnut soqutiginaatilinnik imaqarluarsimasoq, silaannaallu allanngoriartornerata malunnaatai issittumi nunanit tamanit uppernarsineqarsimasoq.

- Ataatsimut isigalugu ataatsimeersuarneq soqutiginartorujussuuvoq, pingaartumik aamma pinngortitap allanngoriartornera taanna uagut kisitta misiginngikkipput uppernarsineqarpoq, nunatsinni, naggueqatitta tamarmik assigiilluinnarmik oqariartuutigaat, ukiut siuliinut naleqqiullugu atukkat pinngortitaq allanngorujussuartut taamaammallu tusaaneqarnissartik avataani inuiassuarnik assut pingaaruteqartoq malinnaaffigineqartariaqartorlu tassa tassunga soqutiginartorujussuuvoq pinngortitamik uagut atuisuullutalu uumassusilinnik nerisaqartuugatta nalunaarutaat annilaarnarput allanngoriartorneq annertungaarmat, Hans Enoksen oqarpoq.

Naak Nunavumi naalakkersuisut sakkortunerusumik suleqatigineqalernissaat atsioqatigiissutigineqaqqammeraluartoq, Hans Enoksenip oqaatigaa, kisiannili maluginiarsimalluguli Canadami naggueqatigut siunnersorneqarnissaminnik annertoorujussuarmik pisariaqartitsisut.

- Suleqatigineqarnissaminnik, tassa ukua nunat attavii marluk USA Canadalu aamma imaannaanngillat, namminneq oqalugiarnerat tunngavigalugu, ilaatigut aamma tusaaneqarnerat annikitsuararsuuvoq taamaammallu nukittunerusumik aamma inissinniarnissat uagut aamma pisussaaffigisariaqaripput, tassa naggueqatigiinni siuttuuvugut naalakkersuinikkut aammalu nunarsuarmioqatitsinnut attaveqartarnitsigut assorujussuaq uagut tusaaneqartarpugut taamaammat tassuuna ikiuunnissarput isumaqarpunga annertuumik pisussaaffigisariaqaripput, Hans Enoksen oqarpoq.

Hans Enoksenip oqaatigaa nunatta nalaakkersuinikkut misilittakkani tunngavigalugit siunnersuisinnaasoq, nunallu allat misilittagai nunatta aamma ilikkagaqarfigisinnaagai.