Inuit Issittormiut Kattuffiata ICC-p qulissaannik ataatsimeersuarnera, tamatumuuna Alaskami- Utqiagvik-mi pisussaq aqagu aallartissaaq.
Ataatsimeersuarnissami ICC-p ukiunik 30-liinera nalliussineqassaaq, tassungalu atatillugu ICC-p kattuffittut nutarterneqarnissaa, Ruslandimit Alaskamit Canadamit nunatsinniillu ataatsimeersuaqataasussat oqallisigissavaat. Kattuffiuttaaq nutaamik atserneqarnissaanik siunnersuut aamma akuersissutigineqassaaq.
ICC-p Inuit Issittormiut Kattuffiannik ateqarunnaarluni Inuit Issittormiut Siunnersuisoqarfiannik ateqalernissaa siunnersuutaavoq.
Ataatsimeersuarnermi ulluni tallimanik sivisussuseqartussami oqaluuserisassat issittumut tunngasut immikkoortut sisamavinngorlugit agguataakkat oqimaakulupput, ilaatigut tassaallutik:
- Naalagaaffiit Peqatigiit, Silarsuarmioqatigiillu oqallittarfii.
- Ineriartornerup nassatai.
- Piginnaanngorsaanermut tunngasut, sisamaattullu ICC-p nutarterneqarnera.
Aqqaluk Lynge, nunatsinni ICC-p siulittaasua aperaarput oqaluuserisassat taamak oqimaatsigisut ulluni tallimaannarni oqaluuserineqarnissaat sivikippallaannginnersoq. Akivoq oqillinnissamut piffissap sivikippallaarnera ilumoortuusoq.
- Ilumullimi aningaasat aporfiuallaartanngikkaluarpata suleqatigiinniarneq ajornannginnerullunilu qaninnerusinnaagaluarpoq, eqqaamasariaqarporli ICC-p suliarpassui suleqatigiiffinnit allanit ingerlateqqinneqartarmata, assersuutigineqarsinnaavoq Issittumi Siunnersuisoqatigiiffiup suliagut ingerlateqqittarmagit.
Issittumi attaveqatigiinnerup qanoq ililluni pitsanngorsaavigineqarsinnaanissaa ataatsimeersuarnermi taamaalilluni aamma eqqartorneqarumaartoq, Aqqaluk Lynge oqarpoq.