ICC: Nunatsinni puisinniartarneq pillugu isumasioqatigiissitsisoqarli
Piniartut KNAPK-meersut ICC-millu peqataatitat Isumasioqatigiinnermi peqataanissaat, ICC-p siunnersuutigaa, pisariaqassappallu puisiniarneq pillugu immikkut ilisimasallit aamma peqataanissaat siunnersuutigalugu.
Isumasioqatigiinneq piaarnerpaamik pisaqariaqartoq ICC-p siulittaasua Aqqaluk Lynge tusagassiuutinut nalunaaruteqarluni allappoq.
- Siunissaq ungasinnerusoq isigalugu Nunatsinni puisinniarneq pillugu nutaamik periaaseqartoqarnissaa aamma ullutsinnut inuuniarnikkut, aningaasarsiornikkut niueqatigiinnikkullu pissutsinut atuuttunut naleqqussaasoqarnissaa isumasioqatigiissitsinerup siunertarisariaqarpaa, Aqqaluk Lynge oqarpoq.
EU-p puisineersunik tunisassianik EU-mut eqqusseqqusinnginnermik aalajangersagaa, WTO-p unioqqutitsinertut nalilermagu, isumasioqatigiissitsinissamik kaammattuuteqarnermut patsisaavoq
Aamma Canadap Norgellu puisineersunik tunisassianik EU-mut eqqussisinnaajunnaarsitaanertik pillugu WTO-mut suliakkiissuteqarnerat pissutigalugu, isumasioqatigiissitsinermi nunatsinni puisinniarnermut attuumassuteqartut suleqatigiilernissaat ICC-mit neriuutigineqarpoq.
- Kalaallit Nunaat puisinniarneq pillugu qanoq politikkikkut siunnerfeqarniarnersoq pillugu isumasioqatigiissitsinermi ersarissarneqartariaqarpoq, ullutsinnullu pissutsinut atukkatsinnut imaannaanngitsunut naleqqussarneqarnissaa suleqatigiinnikkut siunnersuusiorfigineqartariaqartutut isigaarput, Aqqaluk Lynge naggasiivoq.
