ICC nunat issittumiittut sernigineqarnissaannik nunarsuarmi aqutsisunut noqqaassuuteqarput

Silap pissussaata allanngornera pillugu Københavnimi decemberip qaamataani ataatsimeersuarnermi kinguneqarluartussamik isumaqatigiissuteqarnissamik ICC-mit kissaatigineqarpoq. Inuit Issittormiut Siunnersuisoqatigiiffiat ulluni kingullerni Københavnimi ataatsimiippoq. Siulittaasup James Stottsip Arktisk Rådimi atorfilittat naapeqatigivai, nalunaarummillu saqqummiussinermini oqatigaa Issittoq tassaasoq silap pissusaata allanngornerata qiterpiaa tassanilu Inuit najugaqartut ileqqui piniakkanillu atuinerat innarlerneqareersoq. Ataatsimeersuarnissaq tassaavoq silap pissusia pillugu ataatsimeersuartarnerit 15-issaat. taannalu tassaasussaavoq ataatsimeersuartarnerni pingaarnerpaaq”, James Scott oqarpoq nangilluni oqarpoq. ”Nunarsuarmi siuttunut oqariartuuterput paasiuminarpoq, piffissaajaqqissinnaanngilagut.” James Scott oqarpoq.

Aqqaluk Lynge, ICC-mi Nunatsinni siulittaasoq oqarpoq sermersuup aakkiartupiloornerata takussutissikkaa Inuit tassaasut sakkortunerpaamik allannguutinut eqqugaasussat taamaattumillu naleqqussarnissamut sakkussanik pisariaqartitsisoqartoq. Nalunaarummi Inuit issittormiut silap pissussaa pillugu ataatsimeersuarnissap iluatsilluartumik inerneqarnissaanut pinngitsooratik anguniagassat arfinillit taakkartorneqarput. Inuillu siuttuisa tamakku tamanut takusassianngorlugit saqqummiuppat. Silap pissusaa pillugu Københavimi decembarimi ataatsimeersuarnissami inuit issittoormiusa siuttui peqataasussaapput Naalagaaffiit Peqatigiinni ilaasortaasunut nalunaarutip imarisaanik eqqaasitsiartorlutik tamatumunnga tunngatillugu ICCip siulittaasua James Stotts neriuppoq nunarsuup siuttuisa Inuit issittormiut tusaaniarumaraat.