ICC: Nunat inoqqaavi suli anguniagassaqaqaat
Nunat Inoqqaavisa Atugaat pillugit Isummersoqatigiiffik Naalagaaffiit Peqatigiinni New Yorkimi ulluni kingullerni 14-ini ataatsimiinnerat tallimanngormat naammassineqarpoq, 2014-milu tulliani ataatsimeersuartoqassasoq, ataatsimiinerup naannginnerani aalajangiunneqarpoq.
Inuit Issittormiut Siunnersuisoqatigiiffiani ICC-mi siulersuisuunerni ilaasortaq Hjalmar Dahl New Yorkimi sapaatip-akunnerata siuliani ataatsimeersuarnermi peqataavoq, naalli nuna inoqqaavisa inuuniarnikkut atugaat nunarsuarmioqatigiinnit pitsanngorsaaffiginiarlugit ukiuni kingullerni 20-ni qitiutinneqaraluartut, inuuniarneq pillugu angusat annikitsut takujuminaatsullu, Hjalmar Dahlip oqaatigaa:
- Taamaattumik isumaqarpunga 2014-imi ataatsimeersuarnissamut nalilersueqqissaartariaqartugut maannangaarlu piareersarluta aallartittariaqartugut. Nunat inoqqaavisa pisinnaatitaaffii 2007-imi akuersissutigineqartut nunarsuarmioqatigiinnit qanoq atuutinneqartiginersut qanorlu ataqqineqartiginersut qulaajarneqartariaqarput nalilersoqqissaartariaqarlutillu, Hjalmar Dahl ilaatigut allappoq.
Nunat inoqqaavisa pisinnaatitaaffii naalagaaffinnit malitassatut inatsisinngorlugit inissinneqarnissaat 2014-imi ataatsimeersuarnermi aalajangiiffigisassatut siunnersuutigineqartariaqartut Hjalmar Dahlip aamma oqaatigaa.
Nunarsuarmiut 2014-imi ataatsimeersuarnissaannut piareersaataasumik FN Norgep avannaani Saamit illoqarfianni Altami 2013-imi ataatsimeersuassaaq.