Demokraatineersup Palle Christiansenip Inuit Issittormiut Kattuffiannut ICC-mut tapiissutaasartut, ukiumut 5 millioni koruuniusut peerneqarnissaannut siunnersuutigisaa partiinit tamanit isumaqatigineqanngilaq.
Inuit Issittormiut Kattuffiat ICC nunatta karsianiit ukiumut fem millioni koruuninik tapiiffigineqartarpoq. Tapiissutit ilaatigut ICC-ip allaffeqarfianut inunnik tallimanut sulisoqartumut atorneqartarput allallu Issittumi Siunnersuisoqatogiinnut kiisalu Naalagaaffiit Peqatigiinnut ataatsimiigiartarnernut atorneqartarlutik.
Tassa inuit pisinnaatitaaffiinut tunngasut kiisalu avatangiisinut tunngasunik sullissineq pingaarnertut ICC-ip anguniagaraa.
Demokraatit sinnerlugit Inatsisartunut ilaasortaq Palle Christiansen isumaqarpoq ICC-ip aningaasalersorneqarnera nunatta karsianit pinnani aningaasaliisartunit namminersortunit aningaasalersorneqartariaqartoq.
Siunnersuulli tamanna partiinit allanit isumaqatigineqanngilaq.
Inuit Ataqatigiit siulitaasuata tullia, Kuupik Kleist, tapiissutit peerneqarnissaannut isumaqataanngilaq, isumaqarluni namminersorluni tapissutitigut ingerlatsineq nunatsinni atorneqarsinnaanngitsoq. Kuupik Kleist aamma isumaqarpoq nunanut allanut politikikkut nunarput peqataanerusariaqartoq.
Atassutip siulittaasua Finn Karlsen isumaqarpoq ICC-mut tapissuutit allanngortittariaqanngitsut, “ICC tassaammat issittumi pissutsinut nakkutilliisuusoq”.
Siumukkormiut siulittaasuata tullia Jonathan Motzfeldt oqarpoq ICC- mut aningaasat tapiissutaasartut allanngortinneqartariaqangitsut.
-Imaaginnanngilaq ICC inuit issittormiut suleqatigiinnerannut attaveqaataasoq, aamma suliniutit allat, soorlu avatangiisinut, uumasunut minnerunngitsumillu Nunat Inoqqaavisa Isummersoqatigiiffianni suliniutit nunatsinnut pingaaruteqarluinnartut suliarai, Jonathan Motzfeldt oqarpoq.
Demokraatit Inuit Ataqatigiillu qinersinerup kingorna suleqatigiinniarlutik isumaqatigiissuteqassappata, ICC-mut apeqqut ajornartorsiutinngornavianngilaq.
Kuupik Kleist aamma Palle Christiansen oqarput ICC-mut tunngasoq isumaqatigiinniutigineqarsinnaasoq.