ICC-mut tapiissutit ikilingaatsiassapput

Naalakkersuisut aningaasanut inatsisissamut maannakkut siunnersuutaat piviusunngussappat, Inuit Issittormiut Siunnersuisoqatigiiffiannut, ICC-mut, Namminersorlutik Oqartussat tapiissutigisartagaat ukiuni tulliuttuni ikilingaatsiarneqassapput.
septembarip 22-at 2009 06:55

Siunnersuut naapertorlugu ICC aappaagu 2010-mi 5,4 millionit koruunit missaannik tapiiffigineqassaaq, tapiissutissatulli ukiut tulliinut marlunnut missingersuutit ukiumut 1 millionit koruuninik ikilineqartassapput - 2012-imiit 3,4 millionit koruuninngussallutik.

ICC-lli Nunatsinni siulittaasuata, Aqqaluk Lyngep, tamanna isumakuluutiginngilaa.

Aqqaluk Lynge ilisimatitsivoq Naalakkersuisut siulittaasuat, Kuupik Kleist, attaveqarfigisimagini Namminersorlutik Oqartussat ICC-mut siunissami aningaasaliisarnissaat ataatsimiissutigerusullugu.

Aningaasaateqarfinnit aningaasanik katersisoqartalernissaa, ilaasortanullu akiliisitsisalernissaq, Naalakkersuisut aningaasanut 2010-mi inatsisissami siunnersuutigaat.