ICC-mut ataatsimeersuariat nersorniarneqartut
Alaskamiut immikkut qaaqqusanut ippassaq marlunngornermi unnussiuaartitsipput katersortarfimmi, Midnight Sun Komplex-imi, ilaatigut inuit ataasiakkaat immikkut nersortariallit tunissuteqarfigineqarlutik.
Aqqaluk Lynge, uuma ataatsimeersuarnerup naammassinerani ICC-p siulittaasuatut, ukiut sisamat kingulliit issiareerluni, tunuartussaq aamma tunissuteqqarfigineqarluni qujaniarfigineqarpoq.
AAMMA ATUARUK Martha Lund Olsenip paqumigineqartut nipangiusimaneqarunnaarsikkusuppai
Taamatuttaaq qujaniarfigineqarlutik tunissutisipput Nunatsinneersut allat marluk, tassalu ICC-mi ukiorpassuarni suliaqartoq, Carl Christian Olsen, Puju aamma nunat inoqqaavisa piginnaatitaaffiinik suliniuteqartoq, Hjalmar Dahl.
Taakku saniatigut immikkut qujaniarfigineqarpoq, KNR-ip Canadamiit ilanngutassiisartua, Marianne Stenbæk. Taanna Alaskami inuusuttut ilinniagaqarnissaannik, nammineq piumassutsiminik suliniuteqartuuvoq, Alaskallu avannaarpiarsuani illoqarfimmi Barrow-imi inuusuttut ilinniagaqarsinnaanerat periarfissinniarlugu aningaasaateqarfimmik pilersitsisuulluni.
