ICC-mut aningaasaliissutinit kulturi aningaasalerneqarsinnaasoraa
Kulturikkut pinngorartitsisut ingerlatsisullu ilungersuuteqarput aningaasanut inatsit aqqutigalugu aningaasalersorneqalernissamik. Tapiiffigineqartalissappata aningaasat naggueqatigiit inuit kattuffiannut aningaasaliissutinit aaneqarsinnaasut Demokratit politikkikkut oqaaseqartartuat Niels Thomsen isumaqarpoq.
- Demokraatit takorloorsinnaalluarpaat assersuutitut 2 mio. koruuninik EPI-mut tapiissuteqarnissaq. Malitsigisariaqassuaali assersuutitut ICC-p tapiissutisiarisartagai annertoqataanik ilanngaaffigineqassasut, taama Niels Thomsen oqarpoq.
EPIp sulissutigisassai immikkut ittumik ataatsimeersuarnikkut sapaatip akunnerata naanerani akuersissutineqarput. Tassanilu siunniunneqarpoq aningaasanut inatsit aqqutigalugu aningaasalersorneqarneq anguniarneqassasoq.
- Soorlu EPI-p nalussagunanngikka ima inissisimavugut ukiut tamaviisa aningaasanut inatsisitsinni 1 milliard koruunit missaanik nassaartariaqartartussaalluta atungarissaassuseq piusoq attatiinnarumallugu. Taamaattumik inuiaqatigiit aningaasaataat sukangasuumik pingaarnersioqqinnaartariaqarpagut, taama Niels Thomsen oqarpoq.