ICC-mi Pavia Nielsen oqalugiarpoq
Inuit Issittormiut Kattuffiata Alaskami ataatsimeersuarnerani piniarnermut sammisunik saqqummiussisoqarnera aalisartoq piniartorlu Pavia Nielsen, Uummannameersoq oqalugiartunut ilaavoq.
Piniartut issittumi nunallit silap allanngoriartorneranik ajornartorsiuteqarput. Ataatsimeersuarnermi suut pissarsiarisimanerai aperigatsinni ima akivoq:
Piniartut ataatsimeeqataasut KNAPK sinnerlugu Leif Fontaine aamma Uusaqqak Qujaukitsoq, aamma qujanartumik ersarissumik aamma saqqummiussaqarput, piniartutut killiffitsinnik.
Uanga tapersiillunga periarfissaq uannut tunniunneqartoq annikikkaluartoq angumersiniaallunga, oqaatigerusutakka tamaasa oqaatigaakka.
Inuit maani ataatsimiittut tamarmik paasinnimmata aamma oqaaserisakka tuluttuunngorlugit tunniussuunneqarmata, isumaqarpunga paasineqarluartugut.
ICC-mi uanga nammineerlunga oqaaseqarninni, pappialanngorlugu aamma tunniunneqartumi qinnuiginnippunga ajornartorsiutivut suleqataaffigeqqullugit, isumaqarpungalu tusarlugulu tigugaat.
Pavia Nielsen aperigatsinni siunissami piniartut soqutigisaat pillugu qanoq ICC-p sulissussisinnaanera takorloorneraa, akivoq ima:
-Tassa manna tikillugu Inuit Issittormiut Kattuffiata sulissutigivaa inuit ikinnerussuteqartut atugarisaasa oqilisarneqarnissaat. Uagullu inunnut tamakkununnga ilaavugut.
Avannaani piniartut atugarisaaat ullutsinni oqimangeriartuinnarnerarpai, oqarluni killilersuineq sakkortusiartuinnarmat, uumasunik nungutaaqqajanngitsunik nungulerneraanerup kingunerisaanik, taavalu aamma illuatungaatigut silaannaap kissakkiartornerata kingunerisaanik piniarfinni sikuusarnerata annikilliartornera, ajornartorsisutaasut.
- Siku saaliartuinnarpoq aammalu sikukkut piniusersorniaraluaraanni nakkisaartumik piniarfiusinnaanani. Soorunami pinngortitarsuup nukissui ICC-p soriarsinnaanngilai. Kisiannili avataanit paasineqarnissarput annertuumik sulissutigineqartariaqarpoq aamma ICC-tigoorlugu.
Pavia Nielsen taama suleqatitsinnut Else Olsvigimut oqarpoq, neriuutigaalu nunatsinni ICC-mi siulersuisut ataatsimoorlutik sunniiniarlutik suliniartuarnissaata pinissaa.
