ICC: Kerry præsidentinngoruni pitsaanerussagaluarpoq

USA-mi præsidentimut qinersineq nunatsinni malinnaaffigineqarluarpoq. Kisitsinermilu malinnaasut ilagaat nunatsinni ICC-p præsidentia Arkaluk Lynge. Taanna isumaqarpoq nunani issittuni mingutsitsineq eqqarsaatigalugu John Kerry præsidentitut naleqqunnerussangaluartoq.

 - USA-mi præsidentimut qinersinermi maannamut kisitsisaagallartut takutippaat George W. Bush-ip ingerlaannarnissaa, naak John Kerryp qinigaanissaa neriuutigisimagaluarlugu. Tassami issittumi avatangiisit eqqarsaatigalugit silaannaallu kissakkiartornerata kingunerisaanik nunatsinnut sunniutssai eqqarsaatigalugit George Bush kyoto-mut isumaqatigiissummi atsioqataanikuunngilaq.

Qularnanngitsumillu Kerry qinigaassangaluaruni  silaannaap kissakkiartornerata unikaallatsinnissaanut suleqatigiinnermut iluaqusiissangaluartoq.  Pissutsit maannakkutut ittut ingerlaannassappata, George W. Bush qinigaaqqissappat naatsorsuutigisariaqassaaq ukiuni tulliuttuni sisamani pissutsit ilungersunaareertut allannguuteqangaarnavianngitsut, Arkaluk Lynge isumaqarpoq.

Ukioq ataaseq qaangiuppat Alaskami inuit ICC-mi siuttuuneq tiguneqartussaavoq, Arkaluk Lyngellu neriuutigaa USA-p nunani issittuni apeqqutit pillugit aalajangersaanissami Kattuffik sunniuteqarsinnaanera annertunerulissasoq.