ICC Kalaallit Nunaat nutaamik pisortaanertaarpoq

Eskimolog Mads Fægteborg Nunatsinni Inuit Issittormiut Siunnersuisoqatigiiffiata Nuummi allaffeqarfiani pisortaanertut 1. april atorfeqalerpoq.
Assi © : ICC
apriilip 04-at 2016 10:44

Atorfik piffissangaatsiaq inuttaqarnikuunngitsoq ukiunut marlunnut killilerneqarpoq, maannakkullu ICC Kalaallit Nunaata siulittaasuata qinigaaffia 2018-imi naasussaq malittussaallugu. ICC Kalaallit Nunaat tusagassiorfinnut taama nalunaaruteqarpoq.

Fægteborg ukiut 40-it missaat nunatsinnut issittumullu tunngasunik suliaqarsimavoq, taamaattumillu suliat ICC-mut tunngasut ilisimalluarlugit.

Suliffeqarfiutigisimasani aqqutigalugu ukiuni 33-ni assigiinngitsutigut ICC-mut tunngasunik suliaqartarsimavoq, ukiunilu kingullerni najugaqarfimminniit ICC Kalaallit Nunaannut siunnersortaalluni.

Fægteborg atorfittaarnermigut Stubbekøbingimiit Nuummut nuukkallartoq, nunatsinnut issittumullu tunngasunik atuakkiullattaartarnermigut ilisarisimaneqarluarpoq aamma issittumut tunngasutigut pisuni assigiinngitsuni saqqummiussaqartarnermigut.