Nunatsinni kommunit ilinniartitaanermut ataatsimiititaliaat, IMAK aamma ICC Kalaallit Nunaat marlunngormat oktobarip 29-ani ataatsimiinnerminni naggueqatigiit Inuit ilinniartitaanerannut siunnersuisoqatigiinnik pilersitsimmata IMAK-imi siulittaasoq, Birthe Møller Therkildsen, siunnersuisoqatigiit siulittaasuattut toqqarneqarpoq. Toqqorsivimmit assiAssi: IMAK

ICC Kalaallit Nunaat naggueqatigiit Inuit ilinniartitaanerannut siunnersuisoqatigiinnik pilersitsisoq

ICC Kalaallit Nunaat nunatsinni kommunit IMAK-ilu peqatigalugit naggueqatigiit Inuit ilinniartitaanerannut siunnersuisoqatigiinnik pilersitsivoq.

Tamanna oktoberip 29-ani ataatsimiinnermi pivoq.

Siunnersuisoqatigiit Canadami, Alaskami, Tjukotkami nunatsinnilu naggueqatigiit Inuit misilittakkanik avitseqatigiittarnissaannut iluaqutaanissaat siunertaralugu pilersinneqarput.

Nunatsinni kommunit ilinniartitaanermut ataatsimiititaliaat, nunatsinni meeqqat atuarfiini ilinniartitsisut kattuffiat, IMAK, aamma ICC Kalaallit Nunaat marlunngormat oktobarip 29-ani ataatsimiinnerminni siunnersuisoqatigiinnik ilaatigut naggueqatigiit Inuit ilinniartitaanerannut tunngasutigut siunnersuisartussanik pilersitsipput.

AAMMA ATUARUK Utoqqartatta ilisimasaat atorluarnerussavagut

IMAK-imi siulittaasoq, Birthe Møller Therkildsen, siunnersuisoqatigiit siulittaasuattut ataatsimiinnermi toqqarneqarpoq.

Taama ittumik siunersuisoqatigiiliortoqarnissaa ICC naggueqatigiit Inuit ilinniartitaanerat pillugu Nuummi 2018-imi ataatsimeersuartitsimmat siunnersuutigineqarpoq.

Siunnersuisoqatigiinni pilersinneqaqqammertuni ilaasortat misilittakkaminnik naggueqatigiit Inuit piorsarsimassutsikkut naleqartitatigullu atugaasa siuarsaaviginissaannut misilittakkaminnik avitseqatigiittalerniassammata siunnersuisoqatigiit pilersinneqarput.

Siulittaasoq, Birthe Møller Therkildsen, taama nassuiaavoq.

AAMMA ATUARUK Oqaatsivut takornartallu oqaasii pingaaruteqarput

- Uagut nammineq oqaatsitsinnik atuartitsissutiliatigut siuttuusorujussuusugut malunnarpoq. Canadami, Alaskami Tjukotkamilu namminneq oqaatsitik atorlugit atuartitsissutiliaat ikittuaraararsuupput. Uagullu maani tuulluussartuarlugillu inerisartuartarpavut. Assersuutigiinnarpara taanna. Tassuunartaatigut uagut tunniussassaqarsinnaasorivugut, nammineq oqaatsitsinnik atuartitsinitsinnut tunngatillugu, Birthe Møller Therkildsen oqarpoq.

AAMMA ATUARUK Naggueqatigiit oqaasii ilinniagaqarnermut pitsanngorsaataassasut

Siunnersuisoqatigiit kalaallit kulturiat qanoq ililluni attanneqartuarsinnaanersoq aamma misissussavaat.

- Assersuutigalugu kujataani kippartarneq. Tamanna ullumikkut annilaanganartorujusuarmik inissisimasutut taavaat: "Immaqa tammariartorpoq". Atuartummi misilitsiffiisa nalaani kippartaramik, Birthe Møller Therkildsen oqarpoq.

Siunnersuisoqatigiilli misilittakkaminnik nunanut allanut ingerlatitseqqiiginnaratik nunat allat aamma isumassarsivigisassavaat.

AAMMA ATUARUK Inuit ilinniartitaanerat pillugu ataatsimeersuarneq

- Nalunngilarput Alaskamiut, Canadamiut Tjukotkamiullu utoqqartatik atorluartaraat utoqqartaminnullu ataqqinnittorujussuusut. Uagut taakku sutigut isumassarsivigisinnaanerivut misissussavarput, Birthe Møller Therkildsen oqarpoq.

Birthe Møller Therkildsen Nuummilu Nuussuup Atuarfiani pisortaq Kattie Egede Motzfeldt siunnersuisoqatigiinni ilaasortaapput. Kommunit siunnersuisoqatigiinni sinniisuutitassaminnik aamma toqqaassapput, ICC Kalaallit Nunaallu siunnersuisoqatigiit allaffeqarfiattut atuutissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat