ICC: Issittumi Siunnersuisoqatigiinni sulineq allannguuteqanngilaq
Inuit Issittormiut Siunnersuisoqatigiivisa siulittaasuat Aqqaluk Lynge taama oqarpoq:
- Issittumi Siunnersuisoqatigiit ingerlanneqarnerat annertunerusumik allanngunngillat, naalagaaffiillu inissisimanerat aamma taamaaginnarluni. Aamma oqaatigisariaqarpoq erseqqissaatigineqartoq naalagaaffiit ilaasortaasut, tassa imaappoq Savalimmiuni Namminersornerullutik Oqartussat imaluunniit Nunatsinni Namminersorlutik Oqartussat taakku ilaasortaanerat erseqqissarneqanngilq, taamaallaalli taaku iluminni namminneq Kunngeqarfiup Danmarkip iluani aaqqiissutissat oqaatigineqartut taakku takuinnarsinnaavagut, ICC-p siulittaasua Aqqaluk Lynge oqarpoq.
Nunatta Issittumi Siunnersuisoqatigiinni sulinermut peqataaqqilernera Naalakkersuisut siulittaasuata Aleqa Hammondip ajugaanertut ippassaq taavaa, Inuit Ataqatigiillu siulittaasuat Kuupik V. Kleist akerlianik oqarluni Nunarput sanngiinnerususutut inissisimalersoq.
Nunarpulli tassunga atatillugu ajugaasutut sanngiinnerusutulluunniit inissisimalernersoq, Inuit Issittormiut Siunnersuisoqatigiiffiata annertunerusumik oqaaseqarfigisinnaannginnerarpaa, Nunattali Issittumi Siunnersuisoqatigiinni sulinermut peqataaqqilernera nuannaarutiginerarlugu.
Siunnersuisoqatigiinnili sulineq Nunatta tungaaninngaanniit killeqarsinnaavoq, inuttassaaleqisoqarnera ilaatigut pissutaatinneqarluni.
Nunatta Issittumi Siunnersuisoqatigiinni sulinermi peqataajumajunnaarnerigalua ilaatigut pissutaalluni ataatsimiinneq pingaarutilik Nunatsinni septembarimi pisussaagaluaq Savalimmiunut nuunneqarpoq, Aqqaluk Lyngellu tamanna uggoraa:
- Imartatta siunissami qanoq iliuuseqarfigineqarnissaa pillugu ataatsimiinnissaq septembarimi pisussaq Savalimmiunut nuussimavoq, taamaattumik uagut annertuumik inissisimanerput illersorniarlugu periarfissavut annaavavut, taassuma Savalimmiunut nuunneqarnerata kingorna, Aqqaluk Lynge oqarpoq.
- Issittumi Siunnersuisoqatigiinni suleqatigiiffippassuaqarpoq, ataatsimiititaliallu tallimat arfinillit ilaasortaaffigineqarsinnaallutik, Nunarpullu tamakkiisumik ilaaniarpat kalaallit suleqatigiiffinni tamani ilaatitaqarnerat pingaaruteqartorujussuuvoq, ullumikkut taamaannginnami. Taamaattumik inuttassaaleqineq-una uani eqqartorneqarnerusariaqartoq, Aqqaluk Lynge ilaatigut oqarpoq, imalu nangilluni:
- Nunarput allatut ilioraluaruni Naalakkersuisullu Kirunami immaqa oqalugiarsimassagaluarpata immaqa taanna pikkunarnerusumik kinguneqarsimasinnaagaluarpoq. Imatut ataatsimiigiarumajunnaarneq taanna uagutsinnut assut oqimaaqutaasimavoq, ICC-p siulittaasua Aqqaluk Lynge oqarpoq.
