ICC-ip aningaasaateqarfiit atorfissaqartippai
- Inuiaqatigiit aamma Naalakkersuisut eqqartortagaat, inuiaqatigiinni allannguinerujussuit suna kingunerissavaa? Inooqatigiinnikkut allannguinerit ajornartorsiutinik nutaanik pilersitsippata uangunaasit akilissavarput? Tamakkulu piareersimaffigissagutsigit avataannerssunik aningaasalersuisinnaaneq pilersinneqartariaqarpoq, Aqqaluk Lynge oqarpoq.
Aningaasaateqarfissuit aningaasaliinissaat iluatsissappat aningaasat atorluarneqarumaartut, Aqqaluk Lyngep oqaatigaa, tassami ingerlatsivissuit angisuut Nunatta pisuussutaannik piiaaniartut amerligaluttuinnartillugit, tamakku pillugit tusarniaanerit amerliartuinnartut pisalersussaapput, tamakkulu isiginngitsuusaaginnarneqarsinnaanngitsut ICC-ip præsidentiata oqaatigaa.
- Ingerlatsivissuit nunarsuatsinni annerpaat ilaasa Nunarput soqutigilluinnarpaat. Tamakku maaniilerpata inuinnaat qanoq illersorneqarsinnaaneri aamma kikkut tamat oqartussaaqataanerisa illersorneqarnissaat, maani isumasioqatigiinnitsinni sammisatta ilagaat.
ICC-ip præsidentiata aamma oqaatigaa, ingerlatsivissuit maanna tikeralerneranni kattuffiit nukittuut pisariaqartinneqarnerulerneri avaqqunneqarsinnaanngimmat aamma Naalakkersuisunit aningaasat pisartakkat naammaqqajannginneri pissutigalugit aningaasaateqarfiit tapiisinnaaneri pisariaqartinneqartoq oqaatigalugu.
- Naalakkersuisunit aningaasat pisartakkagut amigarput, tassami suliassat annertoorujussuupput. Naalakkersuisut siulittaasuata, Kuupik V. Kleistip aningaasaateqarfinnik qammaaniarnera qujanartumik maanna iluatsittutut isikkoqarpoq. Ukiamullu angalaalerutta tamassuma qanoq iluaqutaatiginera takujumaarparput, tassami innuttaasut peqataatinneqarnissaat anguniarparput.
ICC-ip pingaatitaraa, ingerlatsivissuit Nunatsinni pilersaarutaasa piviusunngortikkiartorneri ilutigalugit inuiaqatigiit pisunut malinnaatinneqarnissaat.
- Inuiaqatigiinnut tunniussassarput aana: Ilisimasariaqarparsi suna pisinnaatitaaffigalugu, qaqugukkut angersinnaavisi qaqugukkullu naaggaarsinnaavisi? Naalakkersuisunut qaqugukkut piumasaqassavisi? Suliffissuit imatut imatullu iliuusissaat paasiniassavagut? Paasissutissat inuiaqatigiinnut tunniunnerisigut aatsaat kaalaallit nukittorsarsinnaavugut, aatsaallu taamaaliornikkut inuiaqatigiit nukittortinneqarsinnaallutik.
ICC-ip præsidentia Aqqaluk Lynge taama oqarpoq.
Aningaasaateqarfiit suleqatigiissitaasa, Arctic Funders Group-ip sinniisaat, Nuummut tikeraannginnerminni Sisimiuni Qeqqata Kommunea paasissarsiorfigalugu aamma angalapput.
