ICC iliuuseqarnissaminut piareersimavoq
Inuit Issittormiut Kattuffiata præsidentia Sheila Watt Clotier Islandimi ullumi oqarpoq nunat inuiisa pisinnaatitaaffii pillugit politikkikkut tunngavimmik ersarissumik isumaqatigiissuteqartoqarsinnaanngippat, tamanna Inuit Pisinnaatitaaffii pillugit amerikamiut ataatsimiititaliarsuanut suliakkiinissaminut ICC piareersimasoq.
- Silaannaap allangoriartornerata kingunerisinnaasai nassatariumaagaassaalu Inuit Issittormiut Kattuffiannit assut eqqumaariffigineqarput. Silaannaap allanngornera nunap inuiinut atukkatigut ajornartorsiortitsilissappat, mingutsitsinerlu annertuumik millisinneqassanngippat, tamannalu nunarsuup sinnerani nunanit mingutsitsinermut akisussaaqataasunit tusarneqarusunngippat, inuit Issittormiut Kattuffiat Pisinnaatitaaffiit pillugit sorsuutiginninnissamut piareersimavoq, Sheila Watt Clotier oqarpoq.
Silaannaap kiatsikkiartorneranik nalunaarusiarsuup ilimasaarutigisai eqquutissapata, taava naggueqatigiinni inunni kinguaariit marluk eqqugaassapput, taamaalillunilu kulturerput annertuumik ajornartorsiortinneqalissaaq. Tamanna pissaaq nunarsuup sinneranit ajornartorsiutaalersussat paasiumaneqanngippata.
Taamaassappat nunallu assigiinngitsorpassuit mingutsitsinermut akisussaaqataasut minnerunngitsumik USA, piaartumik iliuuseqanngippata ICC iliuuseqartariaqalissaaq, Sheila Watt Clotier erseqqissaavoq. Ajornartorsiut piaartumik maannagaaq iliuuseqarfigineqanngikkuni Inuit pisinnaatitaaffiinik unioqqutitsinertut nalilerneqartariaqalissasoq Clotier oqarpoq, erseqqissarpaalu unioqqutitsinertut nalilerneqarsinnaalernissaminut ullumikkut qanitttuararsuusoq.
Taamaalilluni Inuit Issittormiut Kattuffiat nunat inuiisa suaruutaannut paasinnikkusunnginneq pissutigalugu, unioqqutitsisoqaraluarpalluunniit eqqartuussisulersuussinani
Inuit Pisinnaatitaaffii pillugit amerikamiut ataatsimiititaliarsuannut, inuit pisinnaatitaaffiisa silaannaallu allanngoriartornerata atassuteqarnerannik naqissuseeqqusilluni suliakkiinialersaartoq Clotier oqarpoq. Silaannaap allanngoriartornera pillugu nalunaarusiaq, inuup aningaasanit atortorissaaruteqarnermillu
salliutinneqartariaqarneranik naqissuseeqataasutut nalilersuppara, Sheila Watt Clotier oqarpoq.
Issittumi siunnersuisoqatigiit Islandimi novembarip 24-ianni ataatsimiilerpata ilaatigut Silaannaap aallangoriartornera pillugu nalunaarusiaq sammineqassaaq. Ataatsimiinnermi issittumi nunallit kattuffii peqataatitaqassapput, Rusland Alaska Canada nunarput Samellu nunaat sinnerlugit ilaasussanik.
