ICC Europami naalakkersuisunut allappoq
Europami naalagaaffiit ilaasa isumaliutersuutigilerpaat puisit amiinik eqqussuinermut killilersuutinik inatsisiliorniarlutik.
Tamanna pillugu nunarput sinnerlugu ICC-p aallartitaa Aqqaluk Lynge Europami naalakkersuisunut allagaqarpoq.
- Aallaavigaarput weekendti kingulleq Beatles-ini tusaamarsarsuaq Paol McCartney CNN aqqutigalugu nuliilu canadami puisinniarneq pillugu saqqummiigamik akerliunertik inunnut millionilippassuarnut suaarutigigaat. Ilaatigut oqarput allaat kalaallit canadamiunut akerlilersuillutik canadamiut nioqqutissiaannik eqqussiumajunnaarsimasut, tamakkua tunulequtaatillugit kukkusunik eqqunngitsumillu taamatut siammarterineq isumaqarpunga nunatsinninngaanniit aammalu ICC-minngaanniit aaqqinniartariaqaripput. Taamaattumik taanna aallaavigalugu akerlilersimavara, tassalu puisinniarnerput massakkut saassunneqaraluttualermat, soorlu aamma januaarip aallaqqaataanili ukioq manna tutsiutereersut. Suli sakkortusiartortumik piniarnermut tunngassut massakkut saassutarineqarput nunarsuaq tamakkerlugu, taamaattumillu uagut qanoq iliuuseqartariaqarpugut, Aqqaluk Lynge oqarpoq. Nangipporlu:
- Naalakkersuisut nunarsuarmi europamilu oqarfigisariaqarpavut oqarfigalugit pissutsit eqqunngitsut tunngavigalugit taamatut tusaaqqusaarnerit aallaavigalugit inatsisiliortariaqanngitsut. Massakkorpiaq oqaloqatigiinnitsinni nalunaarut tutsiuppoq Hollandimi puisit amiinik eqqusseqqusiunnaarnissamik inatsit piareersalersimagaat, siusinnerusukkullu aamma Italiap parlamentiani taamatut saqqummertoqarnikuuvoq taamaattumik sakkortuumik aamma uagut akiuuttariaqalerpugut, Aqqaluk Lynge oqarpoq.
Taanna aperaarput taamatut allagaqarnini qanoq kinguneqassangatinneraa.
- Nalunarpoq, tassa taamatut oqaluuserineqarnerata nalaani soorunalimi naggueqatigiit inuit isumartik aamma saqqummiuttariaqarpaat, aammalu imminnut illersoqatigiittariaqarput taannalu tassa uanga siunertarisara. Tusarneqarsinnaassagutta qujanassaaq tusarneqanngikkutta assorsuaq ajornartorsiulissaagut, taama oqarpoq, nunarput sinnerlugu ICC-mit aallartitaq Aqqaluk Lynge.
