ICC ataqqeqatigiinnissamik ujartuivoq
Ataatsimiinneq Norgimi illoqarfimmi Tromsømi ullumi pivoq, taaguuteqarluni "Siku Aaakiartortoq", Inuillu Issittormiut Siunnersuisoqatigiiffiisa sisamat saqqummiussaanni ataqqineqarnissamik qinnuteqaat saqqummiunneqarpoq.
Issittumi pisuussutit oqartussaaffigilernissaat Inuit Issittormiut Siunnersuisoqatigiiffiisa ukiup affaa kingulleq suliarisimavaat, nalunaarummi naliliiffigineqartussanngorlugu.
- Ukiuni tusindtilippassuarni maani najugaqarsimavugut, Issittumilu pisuussutinik atuerusuttut uagut oqaloqatigisariaqarpaatigut pisinnaatitaaffivullu ataqqillugit, Inuit Issittormiut Canadami Siunnersuisoqatigiiffianni siulittaasoq, Patricia Cochran, oqarpoq.
- Nalunaarut manna Inuit Nunaata avissaarluni naalagaaffinngornissaanik nalunaarutaanngilaq, kisianni kikkuunitsinnik, qanoq isumaqarnitsinnik sunillu tunngaveqarluta allanik suleqateqarnissamut piareersimanitsinnik nalunaarneruvoq, Issittormiut Kalaallit Nunaanni Siunnersuisoqatigiiffianni siulittaasoq, Aqqaluk Lynge, oqarpoq.
Inuit nunani sisamaasuni inuiattut ataatsiunerat Inuit Issittormiut Nalunaarutaanni erseqqissarneqarpoq, kiisalu Inuit naalagaaffimmi pineqartuni immikkut inissisimanerat oqaatigineqarluni, inuillu pisinnaatitaaffii pillugit Naalagaaffiit Peqatigiit nalunaarutaata akuerineqarnissaa erseqqissaatigineqarpoq.
