ICC Asilerisullu nersorniarneqarput

Pinngortitaq avatangiisillu pillugit Namminersornerullutik Oqartussanit nersornaasiuttagaq, 50.000 koruuninik aningaasartaqartoq, Kalaallit Nunaanni Inuit Issittormiut Siunnersuisoqatigiiffianut taavalu

pinngortitaq pillugu siunnersortinut, Asilerisunut, ippassaq tunniunneqarput.

ICC-mi suliniutit ilaat, taaguuteqartoq ”Sila Inummut”, Lene Kielsen Holmimit ingerlanneqartoq, nersorniarneqarluni Namminersornerullutik Oqartussanit aningaasaliiffigineqarpoq. Asilerisut nersorniarneqarput pinngortitamut tunngasunik innuttaasunut suliniuteqarluarnerat pillugu.

Naalakkersuisuinut ilaasortap, Agathe Fontainip, nersornaatit tunniuppai, Namminersornerullutik Oqartussat namminneq oqarnerattuut – inunnit, suliffeqarfinnit, atorfeqarfinnit, peqatigiiffinnit, sulerusussuseqarluartut inuiaqatigiinnit nersorniarneqartariaqarmata, pinngortitaq avatangiisillu pitsanngorsarlugillu paarilluarnissaannut iliuuseqartariaqaratta.

Nersornaasiunneqartorlu ICC-mut tunniunneqarmat, oqalugiaateqartoq, allaffimmi pisortaq, Rena Skifte, nersornaasiunneqartumut qujavoq –aningaasallu Sila Inummut atorneqassasut unnerpai.

Ukioq manna issittumut ukioritinneqartumi ICC suliniuteqarpoq.

- Sila Inummi misissuinermi piniartut aalisartullu piumassuseqarluarluarlutik apersorneqartillutik paasissutissiisorpassuit, neriuppugut misissuinerup ingerlanerani ICC-mit inussiarnisaarnertik ingerlatiinnassagaat, allaffimmi pisortaq Rena Skifte oqarpoq.

Asilerisunut nersornaat Ilulissani ataaqatigiissaarisumut Naja Habermannimut tunniunneqassaaq.