ICC amerikami aningaasaateqarfimmut isumaqatigiissuteqartoq
Aningaasaateqarfik PEW USA-imi aningaasaateqarfiit annersaraat, aningaasaateqarnerpaallunilu pingaaruteqarnerpaasoq, suliniutinullu angisuunut atatillugu avatangiinik illersuinissamik innuttaasullu sunniuteqaqataanisaannik suliniuteqartoq.
Aningaasaateqarfiullu PEW-ip nunarput soqutigisupilussuanngorsimavaa. ICC-p siulittaasua, Aqqaluk Lynge, PEW-ip siulersuisuisa aningaasaateqarfiup allaffeqarfiani USA-mi Philadelphiami ataatsimiinnissaannut ippassaq qaaqqusaasoq taama oqaluttuarpoq.
ICC-p aningaasaateqarfik PEW suleqatigereersimavaa, maannalu suleqatigiinnissamik isumaqatigiissuteqarfigeqqillugu, PEW-imeersullu taamaasillutik ukiuni aggersuni Nunatsinnukartartussanngorput.
Peqatigitillugu aamma Kalaallit Nunaata USA-llu akornanni inuusuttut paarlaasseqatigiittarnissaat tapersersorniarpaat.
Aqqaluk Lynge Philadelphiamit oqaluttuarpoq aningaasaateqarfiup PEW-ip isumaqatigiissuteqarfiginera nuannaarutigisupilussuullugu.
- Kalaallit Nunaat ununanit tamalaanit ukiuni makkunani soqutigineqartupilussuuvoq, taamaammat avatangiisinik illersuiniarluni aningaasaateqarfiit nunarsuarmi pingaaruteqarnerpaat ilaannik suleqateqarnissaq peqatigisaqarnissarlu ICC-mut pingaaruteqarpoq, Aqqaluk Lynge KNR-imut taama oqarpoq.