ICC: Akilinermut timmisartukkut attaveqaqqilerli
- Akilinermit toqqaannartumik Kalaallit Nunaannut attaveqaatit taamaatinneqarnerisigut naggueqatigiittut attaveqaqatigiinneq ujariatsinarsisimavoq. Minnerunngitsumik ilaqutariinnikkut annikinngitsumik nunat taakku akornanni ataqatigiilernerisa kingunerisaannik aalaakkaasumik attaveqartarnissaq pisariaqalersimavoq. Maanna pisortat kisimik imminnut attaveqarsinnaanerat pisinnaasarpoq uiartererujussuarnikkut imaluunnit timmisartuaqqanik akikinngitsumik attartornikkut aatsaat pisinnaasarluni, Aqqaluk Lynge allappoq.
Kalaallit Nunaata avammut taama matoqqatigilersimanera ajuusaarnartuusoraa, tassami aatsaat uiartererujussuaqqaarluni nunanut allanut apuussinnaalersimagatta, oqartaaseq malillugu: "aatsaat Roma aqqusaaqqaarlugu" kalaallit angalajumasut nunanut allanut apuussinnaanngorsimammata.
- Tamanna politikkikkut aaqqitaagami aamma politikkikkut iluarsisariaqarpoq, Aqqaluk Lynge, ICC sinnerlugu oqarpoq.