IATA: Timmisartuussinermi 2009 ukiuuvoq ajornerpaaq

Timmisartortitseqatigiiffiit nunani tamalaaneersut kattuffiata, IATA-p 2009 tassaanerarpaa, sorsunnersuup kingulliup kingornagut, timmisartortitsinermi ukiuusoq ajornerpaaq.
Allattoq Elisa Isaksen
januaarip 27-at 2010 14:38

Danmarkip Radiuata nittartagaani taama allaaserinnittoqarpoq.

Timmisartunut ilaasartut aatsaat taamak ikileriartigisut oqaatigineqarpoq, timmisartortitseqatigiiffiillu katillugit 11 milliardit koruuninik annaasaqarput.

Aamma naak 2009-mi decembarimi siuariaallattoqaraluartoq, 2010 ilungersunartussaavoq.

- Ajornerpaaq anigoreerparput, tamatumali nalliuttorsiutiginissaanut pissutissaqanngilagut. Imaannaanngitsunik suli unammilligassaqarpugut, IATA-mi pisortaq BBC-mut oqarpoq.

Nunani tamalaani timmisartuussinerup ajornartorsiornera aamma maani Air Greenlandimit malugilluarneqarpoq.

- Ajornartorsiorneq malugilluarparput. Taamaattumik ileqqaarfiusinnaasunik qanittukkut suliaqarpugut. Taamaattorli timmisartuussisarnerup ineriartornera ernumanartoqartipparput. Assersuutigalugu siunissami akileraarutinik akitsuutinillu amerlanerusunik eqqussisoqarnissaa ilimanarluinnarpoq, Air Greenlandip pisortaa Michael Binzer Radiuaviisimut oqarpoq.