IAp qineqqusaartitaa: Partii Inuit siunnerfiat piginnaatitaaffinnut naapertuutinngilaq
- Inuiaqatigiit kalaallit avissaarfigisinnaasaannik aalajangersaaniarnissaq pisinnaatitaaffiaanissarlu siunertaanngisaannarpoq, soorlumi Nunatsinni partiit ilaasa tamanna anguniarpasikkaat, Johan Lund Olsen oqarpoq.
Namminersorneq pillugu isumalioqatigiissitat marluk isumaqatigiissutaat taassuma innersuussutigai, oqaatsit Inatsisartut oqaluttarfiannit atorneqarsinnaasut qinerseqataasinnaanermut qinigaasinnaanermullu attuumassuteqassasut isumaqatigiissutigineqarmat.
Kalaallit-qallunaallu Namminersorneq Pillugu Isumalioqatigiissitaata isumaliutissiissutaani ilaatigut ima allassimavoq:
"Piginnaatitaanerit pisussaaffiillu imminnut naapertuuttuunissaat aallaavigalugu kalaallit namminersorneq pillugu isumalioqatigiissitaasa eqqarsarnartoqartippaat inuk Inatsisartut ilaasortassaannik qinerseqataasinnaasoq, taamalu qinigaasinnaasoq, oqaatsit nammineq tulluarinerusani atorlugit oqalussinnaanissaanut mattutissallugu", Namminersorneq pillugu isumalioqatigiissitat isumaliutissiissutaanni ilaatigut allassimavoq.
Innuttaaqataasut sisamararterutaasa naalakkersuinikkut oqartussaanermit isummersorsinnaanermillu mattunneqassasut, isumalioqatigiissitaliat kissaatigisimanngisaannaraat, Johan Lund Olsenip oqaatigaa.
- Namminersorneq pillugu inatsit, Inatsit Tunngaviusoq innimigalugu ataqqillugulu isumaqatigiissutigineqarpoq. Taamatuttaaq Namminersorneq pillugu inatsit Naalagaaffiit Peqatigiit inuttut pisinnaatitaaffii pillugit aalajangersagaliai ataqqillugit iluseqassasoq aamma suliaavoq, Johan Lund Olsenip Partii Inuit eqqaasitsissuteqarfigai.
