IA: Uuliasiortussat pillugit suligasuartussanik pilersitsisoqarli
Qaasuitsup Kommuniani uuliasiortunik sullissisinnaasut ataqatigiissarnissaat siunertaralugu suleqatigiissitaliamik suligasuartussamik pilersitsisoqarnissaanik Qaasuitsup Kommuniani Inuit Ataqatigiit maanna siunnersuuteqarput.
Allattoq Lotte Holm
Uuliasiorniat Qaasuitsup Kommuniani qillerinissartik ukiumik ataatsimik siuartillugu ungasinngitsukkut nalunaarutigineqarmat siunnersuut taanna takkuppoq.
Suleqatigiissitaliaq Qaasuitsup Kommunianit, Sulisitsisut Kattuffiini sinniisunik, Sulisartut Kattuffiannit Qaasuitsullu Kommuniani sulisitsisut sinniisaannik inuttaqassasoq Inuit Ataqatigiit siunnersuutigaat, uuliasiortut annertunerpaamik suliffeqarfinnit Nunatsinneersunik kiffartuunneqarsinnaanerat anguniartariaqarmat.
Suleqatigiissitaliamik suligasuartussamik pilersitsiniarnermi siunertaavoq, uuliasiornerup inuutissarsiortortatsinnik aningaasarsiornikkut iluaqutigineqarsinnaanissaa anguniarlugu pilersaarusiorluni sulinissaq.