IA: Tusagassiuutitigut akinik isumaqatigiinniarneq unitsilli

- Inuit Ataqatigiinniit matumuuna ersarissarumavarput, aalisartut inissisimanerat ilungersunarluinnartutut isigigatsigu, susassaqartullu tamasa oqaloqatigiinnissaannut kaammattorlugit, IA-p siulittaasuata tullia, Juliane Henningsen, oqarpoq.

Nuummi aalisartut umiarsualivimmik ullup qeqqanut assersuilinngilaattaanni taama nalunaarpoq. Saarulliit akiisa minnerpaaffissaannik Naalakkersuisut maannakkorluinnaq qulakkerissasut aalisartut piumasaqarput.

- Partiit, piginneqatigiiffiit kattuffiillu tusagassiuutitigut oqallinnerat akinik isumaqatigiinniarnermut eqqaanarnerusoq unitsillugu, oqaloqatigiinnerit piviusumik angusaqarfiusinnaasut aallartinniarlik, Juliane Henningsen oqarpoq. Parteeqataata aalisarnermut naalakkersuisup, Ane Hansenip, aalisartut piumasaqaataat itigarteqqammerpaa, inatsisitigut tunngavissaqannginnerarlugu.

Umiarsualivimmik assersuiniartuni oqaaseqartartoq, Johannes Heilmann, isumaqarpoq, akinik minnerpaaffiliinissamut akornutissaqanngitsoq, Naalakkersuisut aningasaqarnermut inatsit avaqqullugu amerlaqisunik aningaasaliisinnaappata.

Johannes Heilmann oqarpoq, aningaasat Royal Greenladimut aningaasaliissutit ilaannit nassaarineqarsinnaasut.