IA: Toqqissisimannginneq siaruaakkiartorpoq
- Nuannaarutiginngivillugu ataasinngornermi aggustip 25-anni Qanorooq isiginnaarparput, allaallu upperiuminaatsillugu. Aningaasaqarnermut Naalakkersuisup 2015-imut aningaasanut inatsisissamik saqqummiineraniit ullut arfinillit qaangiutiinnartut parteeqataanit pingasunit isornartorsiorneqarpoq.
Inuit Ataqatigiinneersut pingasut Hans Aronsenip, Kuupik V. Kleistip aamma Naaja H. Nathanielsenip ammasumik allakkatik taama aallarnerpaat.
Allamut saaqattaarneq
Taakku innersuussutigaat aningaasanut inatsisissatut siunnersuummi aalisakkat tamarmik 2016-imit akitsuusersorneqalernissaannik pilersaarut. Siumup Inatsisartuni ilaasortaatitaani siulittaasoq Karl Kristian Kruse, Inatsisartuni ilaasortaq Saxtorph Didriksen aamma maluginiarneqartutut - aalisarnermut Naalakkersuisoq Finn Karlsen siunersuummut akerliullutik Qanoruumi oqaaseqarput.
AAMMA ATUARUK VIDEO Saarulliit akitsuusersorneqarnissaannut akerliuvoq
- Naalakkersuisoqatigiit ataatsimoorsinnaarpasinnatik, qinikkatut ataasiakkaatut nammineq soqutigisaminnik aallussisutut saqqummernerat toqqissisimananngilaq. Imaappoq naalakkersuisoqatigiit politikkikkut sammiviat amerlanerussuteqarneralluunniit naatsorsuutigisinnaanngikkipput, IA-meersut pingasut aningaasaqarnermut ataatsimiititaliami ilaasortat allapput nangillutillu:
- Aningaasaqarnermut Naalakkersuisup nutarterinissamik pilersaarutitut saqqummiussai naatsorsuutigisinnaanngikkutsigik - taava Nunarput aningaasaqarnikkut suup tungaanut ingerlaarpa?
AAMMA ATUARUK Suleqatigiissitaq upernaarli oqaluuserineqarsimavoq
Attaveqatigiinnerat annertusaqquaat
Taamaattumik Inuit Ataqatigiit sakkortunerpaamik Naalakkersuisoqatigiinnut kaammattuutigaat, iluminni attaveqatigiinnertik annertuumik annertusaqqullugu, namminnerlu politikkikkut anguniakkatik takorluukkatillu erseqqissarluaqqullugit. Ataasinngormat unnukkut Qanoruumi ajalusoorneq isigalugu toqqissisimananngilaq, Hans Aronsen, Kuupik V. Kleist aamma Naaja H. Nathanielsen allapput imalu erseqqissaallutik:
- Uagut tungitsinnit isertunngisaannarparput isumalluutivut tamatta pigisatta akileraarusernissaat tunngaviatigut ajorinagu. Taamaattorli uagutsinnut pingaarluinnarpoq, akitsuusiineq Nunatta Karsiani amigartoorutit qanoq annertutiginerannit aalajangerneqassanngimmat, inuussutissarsiutilli pissusiviusut malillugit nammassinnaasai tunngavigalugit aalajangerneqassammat. Nutarterisoqarnissaanik nutaanillu isertitaqarnissamik pisariaqartitsineq nassuerutigivarput, suliallu sukumiisumik aamma maanna pisut siunissarlu eqqarsaatigalugit ingerlanneqarnissaa qilanaaralugu, IA-p aningaasaqarnermut ataatsimiititaliami ilaasortaatitaat allakkatik ammasut taama naggaserpaat.
