IA: Suleqatigiinnerup isasooqqajaaneranik naliliissalluni piaarpallaarpoq
- Naalakkersuisooqatigiit isumaqatigiissutaannut tunngatillugu assigiinngitsunik isumaqarnitsinniit, Siumup IA-llu aaqqiagiinnginnerannik taassallugu ingasattajaarneruvoq. Naalakkersuisut maannamut qaammataannarmi atuutereerput. Inatsisartunilu ataatsimiititaliat amerlanerit sulinerminni suli aallartilluanngillat. Taamaattumik suleqatigiinnerup isasooqqaneranik naliliissalluni piaarpallaarujussuarpoq, Naaja Nathanielsen ullumi taama allappoq.
AAMMA ATUARUK Uldum: Suleqatigiinneq tamanut atuuppoq
Inuit Ataqatigiit politikkikkut oqaaseqartuat eqqissisaavoq, aammali naalakkersuisooqatigiit naalakkersuinikkut toqqammavissaat isornartorsiorlugu, aningaasalersorneqarnissaami amigaataasoq isumaqarami.
AAMMA ATUARUK Naalakkersuisut IA-lu attaveqaqatigiinniarnikkut ajornartorsiuteqartut
- Naalakkersuisooqatigiinnissamik isumaqatigiissummi suliassanik pingaarnersiuilluni tulleriiaarineq amigaataavoq, aningaasaliinertaqanngilarlu. Inuit Ataqatigiinnit naalakkersuisooqatigiinnissamik isumaqatigiissusioqataasimasuugutta suliassat ilaasa piviusunngortinneqarnissamik naatsorsuutigineqarsinnaanerinut erseqqissaateqarsimassagaluarpugut, taamatullu suliassat sorliit siunissami arlaannipiviusunngortissallugit isumassarsiatsialattut inissinneqarnissaannut, Nathanielsen taama allappoq.
