Sinerissap qanittuani qaleralittassiissutit politikkikkut oqallisaangaatsiartarput. Pisassiissutit assigiinngitsunik oqaaseqarfigineri pissutaalluni aalisarnermut naalakkersuisuusimasoq Nikkulaat Jeremiassen (S) naalakkersuisutut tunuarpoq.

IA, Siumut Demokraatillu: Qaleralittassiissutit amerlineqarneri ajunngilluinnarpoq

Qaleralittassiissutit Naalakkersuisunit ilaneqarnerat ajunngilluinnarpoq - uummasorsiuut kaammattuutaannit marloriaataagaluarpataluunniit. Partiit annerit taama isumaqarput.

Qeqertarsuup tunuani qaleralittassiissutit Naalakkersuisut amerlivaat.

Taamaalilluni uummasorsiuut aalisagartassiissutinut innersuussutaasa marloriaataat sinnerlugit ukioq manna qaleralittassaqalerlutik.

Inuit Ataqatigiit qaleralittasseeqqittoqarnera tupaallannarigaluarlugu taperserpaat, Siumumiillu uumasorsiuut misissuisarnerat apeqquserneqarluni.
- Inuit Ataqatigiinninngaanniit imatut paasivarput; Qinerseriataartoqassappat aalisartut qinersisartut annaaniarnagit uani marloriaammik pisassiisoqartutut isiginiarneqarsinnaavoq.

Aqqaluaq B. Egede taama oqarpoq, taamaakkaluartorlu aalisagartassiissutit amerlineqarnerat tikilluaqquaa.

- Inuit Ataqatigiinninngaanniit aalisartut pisassaqartuaannarnissaat soqutigisaraarput aammalu piujuaannartitsinissamik toqqammaveqarnissaat. Taamaammat uani ukiumiit ukiumut aalisagaqassutsip Pinngortitaleriffimminngaanniit nalilersorneqartarnera iluarisimaarparput.

AAMMA ATUARUK Naalakkersuisut qaleralittassiisutit amerlivaat

Qeqertarsuup Tunuani qaleralittassat 2.400 tonsinik Naalakkersuisut ataasinngormat amerlivaat. Amerliliinermi ukioq manna qaleralittassat 10.580 tonsiulerput, Pinngortitaleriffimmiit 5.120 tonsiunissaat inassuteqaataagaluartoq.

Uummasorsiuut misissuisarnerat sivikippallaarpoq

Kisianni Pinngortitaleriffimmit misissuisoqaraangat misissuineq sivikippallaartartoq Siumut isumaqarpoq.

- Ullut 14-iinnaat, imaluunniit ullut arfineq-marluk, ilisimatuussutsikkut aalisakkat qanoq allanngunnginnersut alakkarterillutik, misiliillutik.

- Misiliiartorneranni ullut taakku arfineq-marluk iluanni aalisarfik sarfarleqqasimappat taava pisaqarpiarnavianngillat. Uffalu taakku nunap ingerlanneqarneranut tunngaviusartut, Karl-Kristian Kruse oqarpoq.

Aalisagartassiissutilli ukiut siuliini tamakkerneqarneq ajormata, taama ilaqqiisoqarnera peqassutsimut ajoqusiiunnanngitsoq Demokraatit isumaqarput.

- Pisassiissutit aalajangersimasut aalisartunut tunniunneqartartut ukiuni kingullerni nungunneqanngitsoortarneri massakkut paggatassanut pisassiissutit amerlineqarneri taperserpagut. Pissutigalugu isertitassat ukiup sinneranut qulakkeerumallugit taamatut aalajangeeqataavugut, Steen Lynge oqarpoq.

AAMMA ATUARUK Vægten på hellefisk fanget ved Nuuk er faldet med 40 procent

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat