IA Siumullu: Allat tusarniaasarlik
Nunatsinni aatsitassarsiorniartoqartillugu Naalakkersuisut allatut suleriaaseqalernissaat, nalunaarusiami ippassaq saqqummiunneqartumi siunnersuutigineqarpoq. Ilaatigut inuiaqatigiinnut tusarniaatitsinerit suliamut attuumassuteqanngitsunut suliakkiutigineqarlutik.
- Akissaqaraanni aammalu aatsitassanut tunngasunut ilisimasalinnik inuttassaqaraanni, tusarniaatitsinerit, suliffissuarnut attaveqarnerit avatangiisinullu tunngasunut nalilersuisitsisarnerit, Aatsitassanut Pisortaqarfiup suliarisartagai allanut suliakkiutigineqarsinnaagaluarput.
Aatsitassarsiornermut Naalakkersuisoq, Ove Kar Berthelsen Qanoruumut ippassaq taama oqarpoq, nangillunilu ima oqarluni:
- Inuiaat ikittunnguuvugut aammalu aningaasatigut pisinnaasagut annertunatik.
Aatsitassarsiornermut Naalakkersuisoq, Ove Karl Berthelsen, Qanoruumut ippassaq taama oqarpoq.
Naalakkersuisup taama tunngavilersuuteqarnera, Siumup siulittaasuata, Aleqa Hammondip tunngavissaasorinngilaa.
- Isumaqarpunga periarfissarsiornerusariaqartoq, tassami politikkikkut pingaartinneqarpat innuttaasullu toqqissisimanartumik atugassaqartillugit peqataatinneqassappata taamaaliortariaqarpoq. Pissaanermik atornerluinnginnissamik inuttaasut oqariartuutigisaat malinneqassappat, Sara Aaenip innersuussutai malinneqartariaqarput, Aleqa Hammond oqarpoq.
Inatsisartut Inuussutissarsiornermut ataatsimiititaliaanut ilaasortap, Inuit Ataqatigiinneersup, Aqqaluq B. Egede-p oqaatigaa, Aatsitassanut Pisortaqarfiup suliarisartagaat amerlavallaartut, imalu siunnersuuteqarluni:
- Akuersisartuuneq paasissutissanullu assigiinngitsunik isummersinnaatitaaneq siammasissunngorlugu inissinneqartariaqarpoq, tassami ajutoortoqassagaluarpat Naalakkersuisut akisussaaffiat annertoorujussuanngussaaq, taamaammat inuiaqatigiit Naalakkersuisut tatiginninnerat innarlerneqassanngippat suliat avissaartuutsinneqartariaqarput.
Aqqaluaq B. Egedep aamma oqaatigaa Pisortaqarfik akisussaaffinnik tigummisaminik allanut suliakkiinissaa erngiinnaq pisariaqartoq.
- Ajornanngippat piaarnerpaamik suliat avissaartuutsinneqartariaqarput. Ajornartorsiutaavorli tamanna aningaasanik annertoorujussuarnik malitseqartussaassanera aammalu immikkut ilisimasalinnik atorfinitsitsisoqartussaassalluni tamannalu aamma aningaasartuutaassalluni.
Inuussutissarsiornermut ataatsimiisitaliami ilaasortaq, Aqqaluaq B. Egede taama oqarpoq.