IA: Siulittaasoqarfiup aningaasanik atuinera nakkutigineqalissaaq

Inatsisartunut qinersisoqarnerata kinguningua siulittaasoqarfiup atuinera politikkikkut nakkutigineqalernissaanik Demokraatit piumasaqaataat, Inatsisartut kukkunersiuinermut ataatsimiititaliaannut ilaasortap Olga P. Berthelsenip isumaqatigaa.

- Inuit Ataqaqatigiinniit isumaqarpugut, inuiaqatigiit aningaasaataat, Naalakkersuisunit Inatsisartunilluunniit atorneqarunik, atorneqarnerat paarineqarnerallu ersarissumik takuneqarsinnaasariaqartut aqunneqartariaqarlunmilu.

- Taamaattumik aningaasat qanoq atorneqartarnerisa inuiaqatigiinnut ammanerusumik saqqummiuttariaqarnerannik isuma isumaqatigeqaarput, isumaqarlutalu qinersereernerup kingorna sukkanerpaanik piviusunngortinneqartariaqartoq, Olga P. Berthelsen oqarpoq.

Inuit ataqatigiit aamma Demokraatitulli isumaqarput, Siulittaasoqarfik Inatsisartut aningaasanik atuinerat pillugu malittarisassiortariaqartut, tamannalu qinersereernerup kingorna ernertumik pissasoq.

Inatsisartut aalajangiinerat tunngavigalugu, Inatsisartunut namminernut aningaasaliissutit kukkunersiuinermit ataatsimiititaliamik ukiuni amerlasuuni misissorneqarsinnaasimanngillat.

- Soorunami Inuit Ataqatigiit taamanili iliuuseqarniarsimasinnaagaluarput. Kisianni aningaasat aqunnerlunneqarnerannut takussutissat amerlasuut saqqummereermata, massakkut iliuuseqartoqartariaqarpoq, Inatsisartunut ilaasortaq oqarpoq, taamaalillunilu nassuerutigaa, Siulittasoqarfiup matoqqasumik ingerlatsisinnaasimaneranut parteertik akisussaaqataammat.

- Soorunami peqatanikuuvugut, taannalu qimarratigisinnanngilarput, Olga P. Berthelsen oqarpoq.