IA: Sinerissami qanittumi aalisartut atugaat oqallisigineqarlik
Sinerissamut qanittumi aalisartut atugaat Inatsisartut Aalisarnermut, Piniarnermut, Nunalerinermullu ataatsimiititaliaanni oqaluuserineqartariaqarput.
Allattoq Louise M. Kleemann
novembarip 12-at 2008 07:55
Taama isumaqarput Inuit Ataqatigiit, taakkualu tikkuarpaat avannaani qaleralinniat aningaasarsiornikkut ima ajornartorsiortigisut, ullormiit ullormut akiliisinnaasutsimikkut allaat ajutooriaannaallutik.
- Sinerissamut qanittumi aalisarneq peqassutsimut naleqqukkunnaarsimasoq, Ane Hansen tusagassiuutinut allappoq nangillunilu:
- Sinerissamut qanittumi qaleralinniat aamma saarullinniat immikkut ittumik iliuuseqartoqanngippat ataatsikkukanneq akiliisinnaajunnaarlutik unittariaqassappata, tamanna aalisartunut ilaqutaannullu sunniuteqarnerluinnarani aamma nunami suliffinnut sunniuteqartussaavoq, Ane Hansen allappoq, tamatumalu ataatsimiititaliami oqaluuserineqarnissaa piumasaralugu.
