IA qinigassanngortitai saqqummiunneqarput
Inuit Ataqatigiit Inatsisartunut qineqqusaarutissatik qinigassanngortitatillu ullumi saqqummiuppaat.
IA sinnerlugu qinigassaanngortipput inuit 48-it taakkunannga arnat 28-it angutillu 20-it. Qinersineq IA-mut naalakkersuisunngortitseqataasinnaanissamik kinguneqassappat, Siumumik naalakkersuisooqateqaqqinnissaq IA-kkunnit nangaassutigineqarpoq, tamanna pillugu allanik aamma suleqateqalersinnaanissaq ammaffigineqartoq Inuit ataqatigiit siulittaasuat Josef Motzfeldt, tusagassiortunik ullumi katersortitsinermi oqarpoq:
- Inuiat Ataqatigiit Inatsisartuni suleqateqartarnitsinni immaqa misilittagaqarnerpaavugut. Amerlanerpaani Siumullu naalakkersuisooqatigiittarsimalluta. Piffissamili kingullermi isertunngisaannarparput
Najummatsernartuni aqqusaartakkatsinni assorujussuaq ataatsimoorluni saqqummernissaq pingaartissimagatsigu.
Siumup massakkumut annilaarnartunik pissusilersorsimanera naalakkersuisooqatigeeqqinnissamut assut nalorninartorsiortitsisoq Josef Motzfeldt oqarpoq.
Tamanna pillugu partiit allat qineqqusarnermi tatiginassuisiat IA-kkut alaatsinaassagaat siulittaasua oqarpoq.
- arlaannik naalakkersuisooqatigiilioniaannarluni ullumikkut toqqaareernissaq ajornarpoq.
Josef Motzfeldt taama oqarpoq. Demokraatinik suleqarsinnaanissartik apeqqutigineqarmat Inuit Ataqatigiit siulittaasuat oqarpoq Demokraatit inatsisartuni ilaasortaatitaasa tallimaasut siunniussaminnik malinnilluarlutik ingerlatsisimanerat maluginianngitsuugassaanngitsoq. Taamaattorli anguniakkanik siunniussanillu aalajaalluni sulissutiginninneq Inatsisartuni sulinermi kisimiusanngitsoq, anguniakkalli imarisaat apeqqutaaqataasartut Josef Motzfeldt oqarpoq. Pingaarnerpaajunerarpaa politikkikkut imarisat isumaqatigiissutigineqarsinnaasarnerat. Inuiaqatigiinni pissaqarnerusunut iluaqutissanik, soorlu akileraartarnikkut soraarnerusssutisiaqartitsinikkullu immikkut ilusilersoriikkanik aaqqissuteqarnissamik anguniagaqarneq Inuit Ataqatigiinnit orniginartinneqanngitsoq, Josef Motzfeldt oqarpoq.
- Naalakkersuisunngortitsissagaanni Inuit Ataqatigiit isumaat soorunami sassaalliutigineqassapput taavalu illuatungerisat isummatik aamma saqqummiutissavaat isumaqatigiinniarnernilu inuiaqatigiinnut pitsaanerpaamik nalerassanik isumaqatigiissinnaaneq nioqquteqallaqqissutsip isumaqatigiinniallaqqissutsillu kingunerinik inerneqarumaarpoq.
