IA qinersinissamut piareerpoq
Inuit Ataqatigiit folketingimut qinersinissami qinigassanngortitatik ullumi saqqummiuppaat. Kuupik KLeistip saniatigut qinigassanngortipput inatsisartuni ilaasortaq Georg Olsen, Sifia Rossen aamma Aviaaja Vandersee.
Kina statsministerissatut pikkunnerlugu IA-p siulittaasuata Josef Motzfeldtip oqaatigisinnaannginnerarpaa, oqarporli nunatsinnut, naalagaaffeqatigiinnermut nunanullu allanut soqutigisat nalilersueqataassasut.
Nunatta naalagaaffeqatigiinnermi inissisimanera, nunatta nunarsuarmioqatitsinnut qanillaakkiartornera kiisalu qinigaaffimmi aggersumi Danmarkip nunattalu qanoq sunniuteqarnissaat pingaarnertut qineqqusaarutiginiarpaat.
Danmarkimi maanna naalakkersuisuusut ilisimatuussutsikkut misissuinerit aningaasalersornerisa kiisalu nunanut allanut aningaasanik ikiuutissanik ikilisaasimanerat assersuutigai.
Inuit Ataqatigiit Atlantikup avannaani qinikkat suleqatigiiffiata ataannarnissaa aamma sulissutiginiarpaat.
