IA: - Pisut ilungersunartorujussuupput

-Inuit Ataqatigiinnit – siulersuisuunerni, inatsisartuni naalakkersuisunilu ilaasortaninngaaniit – pisut ilungersunartorujussuartut isumaqarfigaavut.

Taama oqarpoq Inuit Ataqatigiit siulittaasuat Josef Tuusi Motzfeldt, ingerlaqqipporlu:

-Minnerunngitsumik ukiut naalakkersuisooqatigiiffitta ingerlaneranni pingajussaa qiteqqutiinnartoq naalakkersuisooqatitta naalakkersuisunik tallimassaa nikisitsinerat eqqarsaatigalugu.

Josef Motzfeldtip erseqqissarpaa pissutsit tamakku atuutsillugit naalakkersuisuni anguniakkatik ajalusoortinneqartartut, inuit ataasiakkaat pissusilersorneri aallaavigalugit.

Inuit Ataqatigiit naalakkersuisuni Siumumik suleqateqarnertik maanna septembarimi Inatsisartut ataatsimiilernissaasa tungaanut nalilersoqqissaarniarlugit aalajangerput.

-Taamaattumik naalakkersuisuni suleqativut siulittaasuat aqqutigalugu ilisimatippavut suleqatigiinneq ingerlaqqissappat anguniakkavut qitiutillugit ingerlaqqittariaqartugut, Josef Motzfeldt oqarpoq.

Taassuma erseqqissarpaa massakkorpiaq Inuit Ataqatigiinnut pingaarnerusoq inuiaqatigiinni pilliutigisassat annertuut eqqarsaatigalugit naalakkersuisooqatigiinnermik kipititseqattaarluni ingerlatsinnginnissaq.