Inuit Ataqatigiit namminneq aalajangiisssasuugunik pineqaatissinneqarsimasut inissiisarfimmiittussanngortinneqartussatut utaqqisuniittut ikilisinniarlugit pineqaatissineqarsimasunut inissiisarfissamik Kangerlussuarmi pilersitsissagaluarput.Assi: KNR

IA: Pineqaatissinneqarsimasunut inissiisarfissamik Kangerlussuarmi pilersitsisoqarlunilu singernequteqartoqartitsisalerli

Inuit Ataqatigiit singernequteqartitsisoqartalersitserusullutillu pineqaatissinneqarsimasunut inissiisarfiugallartussamik Kangerlussuarmi pilersitsisoqartikkusuppaat.

Inuit 64-it pineqaatissinneqareeraluarlutik angalaaginnarnerat akuerineqarsinnaanngilaq. Inuit Ataqatigiit taama isumaqarput.

Taamaammat pineqaatissinneqarsimasut pineqaatissinneqarsimasunut inissiisarfimmiittussaanngortinneqarnissamik tungaanut singernequteqartitaasalernissaat, partiimit folketingimi ilaasortap Aaja Chemnitz Larsenip piumasaraa.

- Kannguttaatsuliorsimasut inissiisarfimmiitinneqassapput. Maanna inissaalatsisuni pineqaatissinneqarsimasunut inissiisarfinniitissinnaanngikkutsigit singernequteqartitaasalertariaqarput, taanna oqarpoq.

AAMMA ATUARUK Kinguaassiutitigut pinerluuteqarsimasut inissiisarfimmiilernissaminnut inuiaqatigiinni akuusartut

Danmarkimi pineqaatissinneqarsimasut ilaat ullutsinni singernequteqartinneqartarput.

Singernequt elektroniskiuvoq, pineqaatissinneqarsimasorlu angerlarsimaffimminiit ungasippallaartumukarsimagaangat oqartussaasunut imminik kalerriisarpoq.

Nunatsinni ingammik illoqarfinni anginerni sakkukinnerusumik pineqaatissinneqarsimasut singernequteqartinneqartalertariaqartut, IA isumaqarpoq.

IA: Pineqaatissinneqarsimasunut inissiisarfiugallartussamik Kangerlussuarmi pilersitsisoqarli

Inuit 64-t pineqaatissinneqarsimasut pineqaatissinneqarsimasunut inissiisarfimmiittussanngortinneqartussatut utaqqisuniikkamik maanna angalaaginnartut, KNR qaammat una allappoq.

Pineqaatissinneqarsimasunut  inissiisarfinnut utaqqisuniittut

 

Nunatsinni pineqaatissinneqarsimasut illoqarfinni qulingiluani nunaqarfinnilu sisamani pineqaatissinneqarsimasut inissiisarfimmiilernissaminnut utaqqisoqarpoq.

 

Taakkunannga:

  • 25-t kinguaassiutitigut pinerluuteqarsimapput (taakkunannga 15-it meeqqanut 15-it inorlugit ukiulinnut pinerluuteqartuullutik)
  • 21-t nakuusernermut atatillugu eqqartuussaasimapput
  • 13-it  aanngajjarniutinut inatsisit pillugit eqqartuussaasimapput
  • Tallimat tillinnermut, pisuttorniarluni pinerluuteqarnermut assingusumullu atatillugu eqqartuussaasimapput.


Tusarfik: Nunatsinni Pinerluttunik Isumaginnittoqarfik

Taakkunannga 64-iusunit 25-t kinguaassiuutitigut pinerluuteqarsimapput. Taakkunannga 25-usuni 15-t meeqqanut 15-iliineqanngitsunut kinguaassiuutitigut pinerluuteqarsimapput.

Sakkortuumilli, soorlu nakuusernermik kinguaassiuutitigullu kannguttaatsuliornermik pinerluuteqarsimasut  singernequteqartitaasalernissaat naammaqqajanngitsoq, IA isumaqarpoq. 

Pineqaatissinneqarsimasunulli inissiisarfissamik Kangerlussuarmi pilersitsisoqartariaqartoq, Aaja Chemnitz Larsen oqarpoq:

- Inunnut navianartorsiortitsillutik pinerluuteqarsimasut pilertortumik inissiisarfimmiittussanngortinneqartarnissaat pingaarnertut salliunneqartariaqarpoq, sakkukinnerusumillu pinerluuteqarsimasut singernequteqartitaasalertariaqarlutik. Kannguttaatsuliorfigineqarsimasummi kingunerlutsitseqqittarnerat eqqarsaatigalugu kannguttaatsuliorsimasut angalaaginnarnerat akuerineqarsinnaanngivippoq.

Ingammik meeqqat kannguttaatsuliorsimasutut pineqaatissineqareersimasumik siumugaqaratarsinaanerat aarlerinaqisoq, Meeqqat Illersuisuat MIO-meersoq Aviâja Egede Lynge isumaqarpoq.

AAMMA ATUARUK MIO pineqaatissinneqarnissaminnut utaqqisut pillugit: Annilaarnaqaaq

Danskit inatsisinik atuutsitsinermut ministeriata, Nick Hækkerupip (S), KNR tamanna pillugu allaatigisaminik saqqummeereersorlu, iliuuseqarfiginialerpaa.

- Pineqaatissiisarnerup qaffasissusaa qaffanneqarsinnaanerulerniassammat inissiisarfinni amerlanerusunut inissamik nassaarsiornermik aallartitsivunga. Inissat taakku qanoq atorneqarsinnaanerat pillugu Naalakkersuisullu aalajangeeqatiginiarpakka, inatsisinik atuutsitsinermut ministeri KNR-imut allappoq. 

Tamannali naammaqqajanngitsoq, Aaja Chemnitz Larsen oqarpoq. Nunatsinnimi pinerluttunik isumaginnittoqarfik aningaasaqarnikkut kipiluttunartumik inissisimavoq sulisussaaleqillunilu. Taamaammat amerlanerusunik aningaasaliisoqartariaqarlunilu pinerluuteqarsimasunut inissiisarfissamik piaartumik pilersitsisoqartariaqartoq, taanna isumaqarpoq.

- Oqallisigiinnarnagu maannangaaq iliuuseqartoqartariaqarpoq, Inuit Ataqatigiiillu isumaqarput singernequteqartitsisoqartalertariaqarlunilu pinerluuteqarsimasunut inissiisarfiugallartussamik pilersitsisoqartariaqartoq, Aaja Chemnitz Larsen oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat