IA peqqissaasut ernumasut pillugit: Naalakkersuisoq maannakkut iliuuseqassaaq

Peqqissaasut qinnguartaasartullu piffissami matumani toqqissisimatik sulisarput.

Taakku Danmarkimi nutaanik suleqatertaartarput – taakkulu ilaat tikikkaangamik ulluni tallimani angerlarsimaannaqqaarnissaat pisariaqanngilaq.

Tamannali ajunnginngitsoq, Peqqissaasut Kattuffiat isumaqarpoq.

Inuit Ataqatigiit oqallinnermut maanna aamma akuliuppoq.

- Peqqissaasut kattuffiata tusagassiuutinut ernumassutiminnut nalunaarutaat tamakkiisumik taperserparput, Inuit Ataqatigiit Inatsisartuni peqqissutsimut oqaaseqartartuat tusagassiuutinut nalunaarummi oqarpoq.

- Ajutoorujussuassaagut peqqinnissaqarfimmi sulisuvut minnerunngitsumillu napparsimasut, pingaartumik peruluttut aamma napparsimalertissagutsigit.

Immikkut akuersissuteqarfiusinnaasut

Peqqinnissaqarfimmi sulisut inuiaqatigiinni pingaarutilimmik inissisimanerat pissutigalugu nakorsaanerup immikkut ittumik akuersissuteqarsinnaaneratigut peqqinnissaqarfimmi atorfinittut nutaat erngertumik sulilersinnaapput.

Peqqissaasut Kattuffiatali nutaanik piumasaqaasiortoqarnissaa piumasaraat: Atorfinerlaat angalasutut allatuulli - ulluni tallimani angerlarsimaannassapput covid-19-imillu tunillatsissimannginnermut uppernarsaateqassallutik.

Tamannalu Inuit Ataqatigiit taperserpaat:

- Peqqinnissaqarfimmi sulisuvut, pingaartumik sinerissami amerlasuunik sulisoqarfiunngitsumi, nappaalalissagaluarpata sulisussaaleqisorujussuussaagut, tamannalu killiffigerusunnanngeqaaq. Taamaammat Naalakkersuisoq, Nakorsaaneqarfillu piaartumik iliuuseqarnissaannik piumasaqarfigaarput, Stine Egede oqarpoq.

AAMMA ATUARUK Peqqissaasut ernumasut: Suleqatit nutaat tunillaassuisuusinnaapput

- Soorunami pinngitsoorsinnaagunanngilarput immikkorluinnaq piginnaasallit utaqqisinnaanngitsumik suliassaqarnerini, ingerlaannaq sulisariaqarnissaat. Taamaattorli sulisut napparsimasullu akornanni nalinginnaasumik suliaqartussat allatulli ullut tallimat mattusimagallartariaqarnissaat pisariaqarpoq, Stine Egede tusagassiuutinut nalunaarummi oqarpoq.

Nunatsinni maannakkut coronamik tunillatsissimasut marluupput. Taakku tamarmik Nuummiipput, mattusimallutillu.

KNR-ip Peqqissutsimut Naalakkersuisoq, Anna Wangenheim (D) oqaaseqartinniarsaraa. Tamannali suli iluatsinnani.