IA: Palle Christiansenip periaasia peqataaffigiumanngilarput
Taamaalilluni Tusagassiortut Peqatigiiffiata Palle Christiansenip periaasia pillugu ippassaq sakkortuumik isornartorsiuinera IA-mit taperserneqarpoq.
Partiip politikkikkut oqaaseqartartua, Folketingimut Inatsisartunullu ilaasortaq Juliane Henningsen ullumi tusagassiorfinnut nalunnaarummini allappoq, IA-p tamat oqartussaaqataanerat kiisalu tusagassiorfiit aaqqissuisoqarfiisa namminneq kiffaanngissuseqarnerat ataqqigaa, aamma tusagassiortunik katersortitsinerni politikerit namminneerlutik tusagassiortunik katersortitsinerni peqataasussanik toqqaasarnerat IA-p peqataaffigisinnaanngikkaa.
- Matumuuna partiit allat ingammillu naalakkersuisut taamatut periaatsip, politikerit tusagassiortullu akornanni suleqatigiinnermik ataqqeqatigiinnermillu navianartorsiortitsisinnaasup ileqquliutinnginnissaa IA-mit kajumissaarutigineqarpoq.
Palle Christiansenip ippassaq taamatut periaatsini nassuiarpaa, pingaartunik saqqummiussissagaangami, soorlu aningaasanut inatsimmik, tusagassiortut aningaasaqarnermik paasisimasallit peqataatinneqartarnissaat pingaaruteqartoq, periaatsillu taassuma atoqqinnissaa mattutivinngikkini.
- Kisiannimi taamaaliorunnaartariaqarpoq, tassami piumasaqaatit taakkua malillugit peqataasarsinnaannginnatta. Taavami namminerminut ikinngutiminullu tusagassiortunik katersortitseriannguarli, taamatut oqarpoq Tusagassiortut Peqatigiiffiata siulittaasua Mariia Simonsen.
Maangaanniillu - suli ataasiarluta - erseqqissassavarput radioaviisi tusagassiortunik katersortitsinerni kikkut peqataanissaat pillugu erseqqissunik malittarisassaqarmat. Tassami tamatumani aaqqissuisoqarfimmi aqutsisoq tassaammat tusagassiortut piffissami tassani sulisut akornanni toqqaasussaq. Imaanngitsoq politikerit namminneq toqqaassasut.