IA-p siulersuisuini kiinnat nutaat
Inuit Ataqatigiinni siulersuisunngortut pingasunik nutaartaqarput. Siulittaasoq Josef Motzfeldt, politikkikkullu siulittaasup tullia Kuupik Kleist ingerlaqqipput, aaqqissuussaanermilu siulittaasup tullerilerpaa Agathe Fontain, inatsisartuni Sisimiut kommunalbestyrelsianilu ilaasortaasoq.
Aningaaserisutut ingerlaqqippoq Aqqalukasik Kanuthsen, allatsitullu ingerlaqqilluni Ane Hansen, taakkua tamarmik inatsisartuni ilaasortaapput.
Qaanaami borgmesteri siusinnerusukkullu Atassummi ilaasortaasimasoq Naimanngitsoq Petersen siulersuisuini ilaasortatut Qaqortumeersoq Lisbeth Søvndahl Pedersen peqatigalugu nutaartaapput, aamma Johan Lund Olsen siulersuisunut uteqqilluni.
IA-p siulersuisuini kinguaariit nikinnissaannut piareersarnissaq ataatsimeersuaqataasut ilaannit saqqummiunneqartoq oqaaseqarfigalugu Josef Motzfeldt oqarpoq, siulersuisuni qanoq ukioqarneq apeqqutaatinneqanngitsoq, nuannaarutiginerarpaalu siulersuisunut sinniisussat inuusuttortaqangaatsiarmata.
Siulersuisuunernut sinniisussanngortut tassaaput Edwardt Mørch, Simon Løvstrøm, Arnajaraq Hansen, Hendrik Brummerstedt, Katsi Egede Motzfeldt aamma Annassi Kleist Karolussen.
