IA-p qinersinermut atatillugu allaffeqarfia serlersaarfigineqarpoq
Partiip sulisuisa arfininngormat GU-p timersortarfeeraani qineqqusaarnermut peqataanerini illup saava inunnik kinaassusersineqanngitsunit qalipaammik qaqortumik serlersaarfigineqarsimavoq. IA-kkormiut taama misigititaanissartik kissaatigisimanavianngilaat, aamma tamat oqartussaaqataanerannik innarliisuuvoq. Qineqqusaarneq oqaatsinik tunngavilersuutinillu aalajangerneqartussaavoq pissusilersuutinillu taama ittunik aalajangerniarneqanngilluinnartussaalluni.
-Illup saava ullaap tungaani salippara. Taamaliortoqartussaanngilaq, ajoraluartumilli inoqarpoq perorsarluarneqarsimanngitsunik. Partii isumaqatigigaluaraanni isumaqatiginngikkaluaraanniluunniit, allat isumaasa namminerlu isummat oqallinnermi saqqummiunniassagaanni allat isumaat aamma ataqqineqartussaapput, Hans Zeeb, IA-mi politikkikkut suliniaqataasoq knr.gl-imut oqarpoq.