Inuit Ataqatigiit nuna tamakkerlugu ataatsimeersuarneranni politikkikkut suliniutissat ullumi oqaluuserineqarput.
Royal Greenlandip namminersortunut tuniniarneqannginnissaa politikkikkut anguniagassatut aalajangiunneqartut ilaraat. Namminersornerullutik Oqartussat 51 procentimik piginneqataajuarnissaat Inuit Ataqatigiit siunnersuuteqarput. Kommuneqarfiit aalisartullu piginneqataasinnaanissaat siunnerfigineqarpoq, Royal Greenlandilu tuniniaavia nunanilu allani ingerlatat tunineqannginnissaat aalajangiunneqarpoq.
Kommuneqarfiit kattussuunneqarnissaat kikkullu ataatsimuulissasut oqaluuserineqartussatut pingaarnerpaatut isigineqanngilaq, suliassalli qanoq piviusunngortinneqassanersut pingaarnertut isigineqarpoq, kingusinnerpaamillu 2009-mi kommunit aaqqissuussaanerat ilusilersorneqareersimassasoq aalajangiunneqarpoq.
Nunarput namminersulivinnissaa pillugu Namminersorneq pillugu Isumalioqatigiissitat suliaat tamakkiisumik tapersersorneqarpoq.
