IA-p pisortaqarfinnik qumartiteriniarneq paasisaqarfigerusuppaa
Allakkat Namminersornerullutik Oqartussat pisortaqarfiinik qumartiterinissamik pilersaarut pillugu apeqquteqaataapput. Inuit Ataqatigiit pisortaqarfiit 14-it arfineq-marluinnanngortinneqarnissaat pillugu sukumiisumik paasitinneqarusupput:
-Tassa paaserusukkatsigu pilersaarut annertorpasissoq januaarip aallaqqaataani atuutilersussaq, tassalu Namminersornerullutik Oqartussat allaffeqarfiisa qumartiterneqarnissaanik pilersaaruterujussuaq, sunik imaqarnersoq sukumiinerusumik paaserusukkatsigu aamma isumaqaratta inatsisartut ilisimatinneqartariaqartut suna ukiortaaminngaanniit naatsorsuutigissaneraat, Kuupik Kleist oqarpoq.
Suliaq tuaviuussaavallaarsorinerpaat?
- Taanna akisinnaanngilara, soorunami nalugakku qanoq sivisutigisumik pilersaarusiortoqarsimanersoq aamma sianiginnginnatsigu qanorpiaq pilersaaruteqartoqarnersoq taamaattumik apeqquterpaalunnik aamma pilersaarusiornermut tunngasunik apeqquteqarpugut ullumikkut, nassuiaavoq.
Allakkaminni Naalakkersuisut siulittaasuata kalaallinik pisortaqalernissamik oqaasii aamma apeqquteqarfigaat.
- Soorunalimi siunertaq taamaattoq ajunngilluinnarpoq, kisianni apeqqutigisarput unaavoq: Taamakkua pisortassat pisortarujussuanngortussat kalaallisut oqalussinnaanerisa saniatigut sunik piumasaqartoqarnersoq.
Kuupik Kleist taama oqarpoq.
Apeqqutit naalakkersuisut siulittaasuannit piaartumik akeqquneqartut ilagaat qumartiteriniarnermi paasisat, misissuinerit missingersuutillu suut tunngavigeqarsimanersut. Suleriaaseq suna atorneqarsimanersoq, soorlu sulisorisat isumasiorneqarsimanersut il.il. kiisalu aningaasanik sipaartoqassanersoq.
