Johan Lund Olsenip Aasianni fabrikkeqaraluarluni privatit qaleralinnik tigooqqasunngornissaannik radioavisimi ippassaq oqaaseqarnera, Aasianni borgmesterip kingusinaarluni akuliunnertut isigaa.
- Ukiup affaa sinnerlugu qaleralittassat oqallisigineqarput, piffissap taassuma iluani Inuit Ataqatigiit Inatsisartuni Aalisarnermut Piniarnermullu ataatsimiititaliaani siulittaasuutitaa ataasiarluni oqatsiarpoq. Ataatsimiititaliami IA-mit ilaasortaatitaq imaalillartoq aatsaat aamma akuliuppoq suliat naammassilersullu, suliamik asuli kinguarsaaniarnermik, asulilu piffissaanngitsukkut oqallittoqarnissaanik kissaateqaannarluni, Enok Sandgreen, kommunimut qinersinermi kingullermi IA-mit tunuarluni attaviitsunngortoq, qanittukkullu Siumumut nuuttoq, tusagassiuutinut taama allappoq.
Royal Greenlandip Aasianni fabrikkia Sigguk A/S-ip pisiaraluguluunniit attartorniarsimagaluarpaa iluatsinngitsumik. Aamma fabrikkimut tulaassussallugit isumaqatigiinniaraluaramik Royal Greenlandip akigitinniagaa mitallernertut isigigamikku Siggukkut itigartitsipput, Enok Sandgreen nangippoq, naggataagullu aperaluni:
- Inatsisartut, Aasianni fabrikki sumut atorniarpisiuk?
Assiliariinnarniarussiuk pilersaaruteqarasilu Aasiaat Kommuneata atorfissaqarteqaa, tunniunniarsiuk, kommunip nammineq sumut atussanerlugu isumaliutigiumaarpaa.