IA-p inuusuttai: Isumaqatigiissut pitsaasorujussuuvoq

Inuiattut akuerisaaneq kalaallillu oqaasiisa pingaarnertut inissisimalernissaat Inuit Ataqatigiit Inuusuttaasa Namminersornermut isumaqatigiissut novembarip 25-ani taasissutigineqartussaq tapersersorpaat, taama IA-p inuusuttaani siulittaasoq Jane Petersen oqarpoq.
novembarip 16-at 2008 17:18

-Isumaqarpunga isumaqatigiissut pitsaasorujussuusoq, pissutigalugu tassani taasinermi aalajangiunneqartussaammat inuiattut akuerisaaneq, oqaatsitta pisortatigoortumik atugaalernissaat. Inuusuttut Ataqatigiinninngaanniit inuiattut akuerisaaneq pingaartittorujussuuarput, pissutigalugu uagut nammineq nunap inoqqaavisa anguniagariuarsimasaat siulitsinninngaanniit, nammineerusussuseqarneq, pisinnaatitaaffitik angorusullugit sorsuuteqartarnerat. Tassani aalajangertussanngoratsigu uagut inuiattut akuerisaanissarput, imaluunniit utaqqiinnarluta teqeqqumut ingiinnarluta arlaannik pisoqarnissaank utaqqerujoornissarput, taanna eqqarsaatigineqartoq inississooq. Kisianni una uagut pingaartipparput, inuiattut akuerisaaneq, tassaavorlu taanna inummut kimulluunniit pisinnaatitaaffimmik angusaqarneq, Jane Petersen oqarpoq, nangillunilu:

-Aamam pisinnaatitaaffik taanna pisinnaatitaaffiinnaanngilaq, kisianni pisussaaffiuvoq aamma. Uagut inuusuttut isumaqarpugut uagut inuusuttut siunissamut suliniuteqarluta taanna ersarissarniarlugu, nunarsuarmioqatitsinnut oqariartorsinnaalerniassagatta uagut inuiattut ima inissisimavugut imatullu ingerlaqqikkusuppugut.

-Oqariartuutit ajornartorsiutillu assigiinngitsut eqqartorneqartarput, illuatungaaniit aamma ajornartorsiutit eqqartorneqarnerat ajorinngilarput, kisianni aamma isumaqarpugut pissatsinnartunik nukinnik tunioraasuusut, ajornartorsiuteqanngippammi nukissagut sumiissagamik. Uagut taakkua nukissanik aallerfigissuagut, sapinngilagut aamma eqqaarusuppara ajornartorsiutinik eqqartuisarneq initoorujussuummat massakkut inuiaqatigiinni. Ajunngittortai tassaapput taakku ujagassagut qiimmassaatissagut nukinnillu annertuunik tunioraasussat, taama oqarpoq Jane Petersen Inuit Aqatigiit Inuusuttaani siulittaasoq.