IA-p Inatsisartuni ilaasortaatitai: Suliniutit angisuut pillugit inatsit Siumup paasisimanngilaa
Inuit Ataqatigiilli maanna oqaatigaat, suliniutit angisuut pillugit inatsit Siumup paasisimanngilaa.
- Naalakkersuisoqatigiit allannguutissatut siunnersuutaat oqaatsinik atukkanik allanngortiteriinnarneruvoq, imarisaami allannguuteqanngilluinnarpoq, IA-p inatsisartuni gruppia tusagassiuutinut taama allappoq.
- Siumup isornartorsiuerujussuarnera tassaaginnarsimavoq allatut oqaatiginninnissamik kissaateqarsimaneq. Allannguutissat minnerusut Siumup maanna siunnersuutigisai inatsimmi ilanngunneqarsimasinnaagaluarput, tassami imaanik allannguiffiunngimmata, IA allappoq.
- Sunami upperineqassava partii oqarpat inatsit akuerineqarsinnaanngilluinnartoq, taamaattorli inatsimmik saqqummiusseqqinnermi oqaatsit allanngortilaaginnarlugit imarisaanullu allannguutaanngitsumik saqqummiussippata? Illuatungiliuttut aperipput.
Taakku isumaqarput suliniutinut angisuunut inatsimmut Siumup isornartorsiuinera inuussutissarsiutinik ingerlataqarfiit eqqarsaatigalugit atugassatigut nalornisitsilersimasoq, Nunatsinnimi nunanilu allani tusagassiuutitigut pisariaqanngitsumik sammineqartorujussuummat.
- Tullissaani inatsisissatut siunnersuutit Inatsisartunut saqqummiunneqartut aallaqqaammulli sukumiisumik misissorneqaraluarpata piffissarujussuaq, aningaasarparujussuit oqaaserparujussuillu sipaarneqassagaluarput, IA-p Inatsiartuni gruppia allappoq.
