IA-p immikkoortortaqarfiani siulittaasoq: Ajortoqarluinnarpoq

Partii Inuit siulittaasuata Inatsisartunut ilaasortatut akuerineqarsinnaannginneranik mamianartuliorneq IA-p Nuummi immikkoortortaqarfiani siulittaasup Nikoline Ziemerip puussutigaa. Tamat oqartussaaqataanerannut ajornartorsiutitut angisuutut isigaa.
apriilip 05-at 2013 13:26

Nikku Olsen qinigaalluartupilussuuvoq partiillu inatsisartunut marlunnik ilaasortaatitaqalernissaa qulakkeerlugu. Taaguunneqarnerilu partiiata pissarsiarisimanngitsuuppagit partii Inatsisartuni ilaasortaatitaqarsinnaanissaa nalorninarsimassagaluarpoq. Partiip katillugit 1930-inik taaguuneqarneranit Nikku Olsen 1126-inik taaguunneqarsimavoq.

- Nunatsinni ajortoqarluinnarpoq, qanormi aamma kinaluunniit qinigassanngortissinnaassava qinigaarujussuarsinnarlunilu qinigaasinnaanngitsutut aalajangiiffigineqarluni! Nunatta partiimut pilersinneqaqqammersumut qinersisartunik salloqittaasimasumut nukippassuarnik atuisimanera tamat oqartussaaqataanerannut ajornartorsiutaavoq angisuupilussuaq. Tassalu qineqqusaarnermut tapiissutit kiisalu pisortat suliffeqarfiutaata KNR-ip aningaasaataanik aallakaatitsineranillu atuilussinnarneq. Qinigassanngortittut qinigassanngortissinnaanerat naqissuserniarlugu tunuliaqutaannik misissuisoqartartuuppat qinersisartut ullumikkutut nikanarsagaasimassanngikkaluarput, Nikoline Ziemer kamalluni oqarpoq.

Aamma Siumut ilanngullugu appisaluuppaa, Nikku Olsenimi qanittumik suleqatigalugu naalakkersuisooqatigiinnik pilersitsisimavoq. Nikku Olsen Partii Inuit sinnerlugu isumaqatigiinniartuuvoq, aamma Naalakkersuisut avammut saqqummiunneqarnerini peqataavoq.

- Siumumut peqqusiileqinanngitsoornavianngilaq, partiimi tatiginassuseqanngitsoq naalakkersuisooqatiginiarlugu isumaqatigiissuteqarfigaa. Partii Inuit sinnerlugit naalakkersuisunngortoq 75-iinnarnik taaguunneqarsimavoq Inatsisartunilu ilaasortanngortut marluusut 211-init 143-nillu taaguunneqarsimallutik. Taakku katikkaanni 970-t missaannik taaguunneqarnissamik piumasaatip affaannaraa ilaasortaatitassallu affaannaa anguneqarsinnaalluni. Nunatsinni tamat oqartussaaqataanerisa nutaajusup qajannartullu taamatut salluliorfigineqarsimanera quianaannarpoq, Nikoline Ziemer oqarpoq nangillunilu:

- Tamat oqartussaaqataanerannut tunngaviusumik ajornartorsiutaasutut isigaara, taamatullu pisoqaqqinnginnissaa anguniarlugu Inatsisartunngortut misissortariaqarpaat nutarteriffigalugulu. Qinigassanngortinnerup akuerineqannginnerani qinigaasinnaatitaannginneq nalunaarutigineqartariaqaraluarpoq. Ilumut taamaaliortoqarsinnaannginnerami?