Suliffeqarfimmi namminersortumi atorfikkallarsinnaannginneq atulersinneqassappat inuiaqatigiinnut iluaqutaanavianngitsoq, Siumut isumaqarpoq.Assi: KNR / Malik Brøns

IA-p atorfinikkallarsinnaannginneq atorfilittanut politikerinullu atulersikkusukkaa

Ukiorpassuarni atorfilittaasimasoq aatsitassarsioqatigiiffimmi atorfinereersorlu, atorfinikkallarsinnaannginnerup atorfilittanut atulersinnissaa oqallisaasorujussuanngorpoq.

Namminersortuni atorfinikkallarsinnaannginneq Inatsisartunut atorfilittanullu atulersinneqassanersoq, Inatsisartuni ilaasortat ukiaru isummerfigissavaat.

Pisortammi suliffeqarfianniit suliffeqarfimmi namminersortumi, atorfilittaanermi suliaqarfigisimasami, atorfinissinnaanera inerteqqutaalersinniarlugu, Inuit Ataqatigiit suliffeqarfimmi namminersortumi atorfinikkallarsinnaannginnerup politikerinut atorfilittanullu atulersinneqarnissaa pillugu siunnersuutertik Inatsisartut ukiaanerani ataatsimiinneranni saqqummiutissavaat.

- Pisortat suliffeqarfianni qaffasissumik atorfillit ilisimasatik suliffittaaminni namminneq allallu iluaqutissaralugu atorneraat apeqquserneqaqqunagu atorfilittaajunnaariitsiarnerminni suliffeqarfimmi namminersortumi atorfinissinnaanerat inerteqqutaalersikkusukkatsigu taama siunnersuuteqarpugut, Inuit Ataqatigiit siulittaasuat Inuit Ataqatigiit Múte B. Egede oqarpoq.

Jørn Skov Nielsen aatsitassarsioqatigiiffimmi Greenland Mineralsimi pisortatut atorfinereersorlu, suliffeqarfimmi namminersortumi atorfinikkallarsinnaannginnerup atulersinneqarnissaa oqallisaasorujussuanngorpoq.

Jørn Skov Nielsen aatsitassanut ikummatissanullu inatsit 2009-imi suliarineqarmat atorfilittani pingaarnersanut ilaavoq, nunatsinnilu uranimut akuersaanngilluinnarneq 2013-imi atorunnaarsinneqarmat naalakkersuisoqarfimmi pisortaalluni.

AAMMA ATUARUK Jørn Skov Nielsenip atorfimmut allamut periasaarnera uparuarneqartoq

Inuit Ataqatigiit tamanna oqallisigineqarnera ilutigalugu Inatsisartuni oqaluuserisassanngortikkusuppaa.

- Atorfilittat ilaata suliffeqarfimmi atorfilittaanermini suliaqarfigisimasamini atorfininnera maanna oqallisaasorujussuummat Inatsisartuni oqaluuserisassatut siunnersuuteqarpugut, Múte B. Egede oqarpoq.

Qanorli sivisutigisumik atorfinikkallartoqarsinnnaajunnaartoqartarnissaanik Inuit Ataqatigiit isumminngillat. Inuillu suliffeqarfimmi namminersortumi atorfinikkallarsinnaajunnaartut taartisiaqartinneqartassanersut, Inuit Ataqatigiit aamma oqaatigisinnaanngikkallarpaat.

Atorfinikkallarsinnaajunnaartitsineq inuup piumasamik iliorsinnaaneranik killiliigallarnerummat taartisiaqartinneqarnissaa pisariaqarsinnaasoq, nunatsinni peqquserluttuliornermik pinaveersaartitsinermut suliniaqatigiiffiup, tassa Transparency Greenlandip erseqqissaatigereernikuuaa.

Partiit naalakkersuisuutitaqartut isumaqataanngilluinnartut

Inuit Ataqatigiit suliffeqarfimmi namminersortumi atorfinikkallarsinnaannginneq atulersikkuppaa, kisianni Siumut tamatumunnga isumaqataanngilluinnarpoq. Tamannami inunnut ataasiakkaanut nunattaluunniit inuinut iluaqutaanavianngitsoq, Siumup politikkikkut oqaaseqartartua Karl Kristian Kruse isumaqarpoq.

- Pikkorissunik politikereqarusukkutta atorfilittaqarusukkuttalu, atorfilittaareernermi allamik suliffittaarnissamut piumasamik iliorsinnaanermik killilersuissanngilagut. Kikkulluunniit sulisinnaassusillit atorfissaqartippavut - pisortat suliffeqarfiini suliffeqarfinnilu namminersortuni, Karl Kristian Kruse KNR-imut mailikkut allappoq.

Atuutilersinneqassappat taamaaliorneq isumatusaarnerunavianngitsoq, Demokraatit aamma isumaqarput.

- Inuup kialluunniit sumi sulerusunnerluni nammineq qaqugukkulluunniit aalajangersinnaasariaqarpaa, suliffittaarnissamullu piumasamik iliorsinnaanerup attannissaa pingaaruteqarpoq. Imaassanngilaq suliffeqarfimmi namminersortumi atorfinikkusukkavit suliffik toqqarsimasat pissutigalugu atorfinikkallarsinnaajunnaartitaaninni suliffeqanngikkallartariaqassasutit, Demokraatit KNR-imut mailikkut allapput.

Partiit allat Inatsisartuni ilaasortaatitaqartut KNR-imit tamanna pillugu isumasiorneqarnerminni akissuteqanngillat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat