IA-p Atassut mattutinngilaa
Ikiaroornartumik ajornartorsiuteqanngitsumik siuttoqarnerarlutik Siumup qinigassanngortitaata inatsisartunut qineqqusaarnermi oqaaserisai Inuit Ataqatigiinnit kinguneqartinneqarpoq, suleqatiginnikkumajunnaarnermik. Atassulli partiit siuttuisa apeqqarissaarfigineqarneranni ippassaq assingusumik oqariartuuteqaraluartoq kinguneqartinneqassanngitsoq, Inuit Ataqatigiit siulittaasuat Josef Motzfeldt erseqqissaavoq.
- Finn Karlsenip oqaaserisai Siumup oqaaserisaanut sanilliunneqarsinnaanngillat. Aamma naalakkersuinikkut sulialimmik ajornartorsiutilimmik nalunngisaqarsimassaguni atornerluisoq qaaqqusariaqarpaa, oqaluullugulu, taama inuusoqarsinnaanngitsoq. Josef Motzfeldt nassuiaavoq.
Josef Motzfeldtip erseqqissaatigaa, Siumumit oqaaserineqartut imminerminut partiimut qanorluunnit mikitigisumik eqquinngitsoq, kisianni:
- Siumumut tunngatillugu, inuiaqatigiinnut pasilliut taama torinngitsigisoq tusaanngitsuusaaginnarsinnaasimanngilarput. Siumup qineqqusaarnermi pissusilersornera eqqarsaatigalugu, pissaaneq tigummiarniaannarlugu sakkut suut tamaasa atorlugit pissusilersornera akuerineqarsinnaanngilaq. Aamma angalasarnitsinni paasisimavarput, inuiaqatigiit allannguinissamik piumasaqartut, tamannalu malillugu sulinerput ingerlateqqissavarput. Josef Motzfeldt taama nassuiaavoq.
Partiissinni ikiaroornartumik ajornartorsiuteqartoqarpa?
- Inuit Ataqatigiit siulersorneqarnerat eqqarsaatigalugu, meeqqanik, imigassamik aanngajaarniutinillu atornerluinerit imaluunnit peqqarniisertarnerit akornatsinni atugarinngilarput. Josef Motzfeldt erseqqissaavoq.
Suleqatiginnikkusussutsimik takutitsinissaq eqqarsaatigalugu Inuit Ataqatigiit pasilliutinut soormi tusaanngitsuusaaginnarsimanngillat, oqarlutillu ajornartorsiuteqarnatik ?
- Oqareernitsitut, arfininngormat qineqqusaartitsinermi Siumumit oqaaserineqartut suminiaraapput, inuiaqatigiinnulli ajortorujussuarmik isiginninnermik takutitsillutik. Ujartugarput tassaavoq, ukiuni kingullerni naammassisinnaasaraluavut kinguarsarneqarsimapput. Kommuninut, namminersornernut aalisarnernullu tunngasut kiisalu suliassat allat annertuut kinguarsarneqartuarsimapput, inuit qassit naalakkersuisooqatitta akornanni nikittariaqarsimanerannik pissuteqartumik. Taamaammat sulisinnaassuseq taama amigartigisoq peqataaffigeqqissallugu piareersimanngilavut. Josef Motzfeldt oqarpoq.
Siumup qinigassanngortitaa Lars-Emil Johansen maanna oqarpoq, qinikkat nuimasut akornanni
ikiaroornartumik atuisoqarnerarlugu qineqqusaarnerit ilaanni qinersisartup oqaasii tunngavigalugit erseqqissaatigisariaqarsimallugu, Siumup siuttuisa akornanni ajornartorsiuteqartoqanngitsoq, oqaaserisanilu Inuit Ataqatigiinnut pasilliutaanngitsut.
